جے آئی ٹی راؤ انوار سے تفتیش جلد مکمل کرے: سپریم کورٹ

22 مارچ ، 2018

سپریم کورٹ آف پاکستان نے نقیب اللہ از قتل کیس میں بنائی گئی جے آئی ٹی کو جلد تفتیش مکمل کرنے کا حکم دیتے ہوئے کیس نمٹا دیا۔

نقیب اللہ قتل کیس میں نامزد معطل ایس ایس پی راؤ انوار گزشتہ روز اچانک سپریم کورٹ میں پیش ہوگئے جس کے بعد عدالت نے ان کی حفاظتی ضمانت منسوخ کی اور عدالت کے حکم پر راؤ انوار کو احاطہ عدالت سے گرفتار کر لیا گیا۔

سپریم کورٹ نے نقیب اللہ از خود نوٹس کیس کا 4 صفحات پر مبنی تفصیلی فیصلہ جاری کرکے کیس نمٹا دیا۔

عدالت عظمیٰ کے تفصیلی فیصلے میں کہا گیا ہےکہ راؤ انوار کے خلاف توہین عدالت کی کارروائی ختم کردی گئی ہے، عدالت نے راؤ انوار کے بینک اکاؤنٹس بحال کرنے کا حکم دیا ہے جب کہ نادرا کو ان کا بلاک شناختی کارڈ بھی بحال کرنے کی ہدایت کی ہے۔

سپریم کورٹ نے راؤ انوار سے تفتیش کے لیے بنائی گئی مشترکہ تحقیقاتی ٹیم کو جلد تفتیش مکمل کرنے کی ہدایت کرتے ہوئے حکم دیا ہےکہ جے آئی ٹی بغیر کسی دباؤ کے ،میڈیا کی خبروں سے مبرا ہوکر قانون کے مطابق شفاف تحقیقات کرے۔

عدالت نے تفتیش تک راؤ انوار کا نام ایگزٹ کنٹرول لسٹ (ای سی ایل) میں شامل رکھنے کا حکم دیا ہے اور تحقیقات تک سندھ پولیس کو ملزم کی حفاظت کا ذمہ دار ٹھہرایا ہے۔

تازہ ترین