یہ ن لیگ کے گزشتہ 5بجٹ سے بہتر ہے، سراج قاسم

28 اپریل ، 2018

کراچی چیمبر آف کامرس نے آئندہ مالی سال کے بجٹ کو الیکشن کا بجٹ قرار دے دیا، بزنس مین گروپ کے چیئرمین سراج قاسم تیلی کا کہنا ہے کہ بجٹ میں جو ابھی سمجھ میں آیا ہے، اس سے یہ ن لیگ کے پانچ بجٹ سے بہت بہتر ہے، جس پر عمل کا انحصار نئی حکومت پر ہوگا۔

وزیر خزانہ مفتاح اسماعیل کی جانب سے آئندہ مالی سال کا بجٹ پیش کرنے کے بعد کراچی چیمبر کے عہدیداران اور بزنس مین گروپ کے چیئرمین نے ایف بی آر افسران کے اختیارت واپس لینے کو خوش آئندہ قرار دیا۔

کچھ صنعتکاروں نے کہا کہ سیلز ٹیکس ریفنڈ کے صرف وعدے ہی لگ رہے ہیں۔

وفاق ایوان ہائے صنعت وتجارت کے سینئر نائب صدر مظہر ناصر نے مجموعی طور پر بجٹ کو اچھا قرار دیا، جبکہ دیگر نے بجٹ کے مختلف اثرات پر بھی بات کی ۔

صنعتکاروں کا کہنا تھا کہ ٹیکس ایمسنٹی اسکیم سے معیشت سے باہر افراد ٹیکس نیٹ میں آسکیں گے اور ساتھ ہی آئندہ بجٹ میں جائیداد پر ایف بی آر کی ویلیو ایشن ختم کرکے اصل قیمت پر ایک فیصد پر رجسٹریشن کے فیصلے سے جائیداد کی قیمت میں استحکام آئے گا۔

صنعتکاروں نے آئندہ مالی سال کے بجٹ میں آٹو سیکٹر، سوشل سیکٹر،کراچی کے لیے خصوصی طور پر گرین لائن کے لیے بسیں خریدنے ،کے فور کے منصوبے اور ڈی سیلیشن پلانٹ لگانے کے اعلان کو خوش آئند قرار دیا۔

تازہ ترین