اسلام آباد(نمائندہ جنگ) وزارتِ پانی و بجلی نے بجلی چوری کی روک تھام کیلئے الیکٹریسٹی ایکٹ میں ترامیم کی سفارشات تیار کی تھیں۔ قومی اسمبلی سے منظوری اور صدرِ پاکستان سے توثیق کے بعد اب نیا قانون نافذ العمل ہو چکا ہے۔ نئے قانون کے تحت بجلی چوری اب ایک سنگین جرم قرار دیا گیا ہے جس کا مقدمہ الیکٹریسٹی یوٹیلٹی کورٹ میں چلایا جائیگا۔ نئے قانون کے تحت بجلی چور وں کی بغیر وارنٹ گرفتاری عمل میں لائی جا سکے گی اور یہ ناقابلِ ضمانت ہو گی۔ نئے قانون کی مختلف دفعات کے تحت بجلی چوروں کو 7سال تک قیدِ با مشقت اور ایک کروڑ روپے تک جرمانہ کی سزائیں دی جا سکیں گی۔اس کے علاوہ بجلی کے واجبات بھی لینڈ ریونیو کے واجبات کی صورت وصول کئے جائیں گے۔یعنی واجبات کی وصولی کیلئے ڈیفالٹرز کی جائیداد کی قرقی عمل میں لائی جا سکے گی۔پرانے قوانین میں بجلی چوری کی سزائیں معمولی نوعیت کی تھیں جس کی وجہ سے بجلی چوری کی روک تھام میں خاطر خواہ کامیابی حاصل نہیں ہو سکی تھی ۔ تاہم نئے قانون میں شامل سخت سزائوں کی وجہ سے بجلی چوری کی حوصلہ شکنی میں مدد ملے گی۔ نئے قانون کے مطابق بجلی کی ٹرانسمشن لائنوں سے چوری کرنیوالوں کو دفعہ 462Hکے تحت 3سال تک قیدبا مشقت یاایک کروڑ روپے جرمانہ یا دونوں سزائیں ہو سکتی ہیں ۔بجلی کی ڈسٹری بیوشن لائنوں پر کندا ڈالنے والوں کودفعہ 462Iکے تحت 3سال تک قید یا 30 لاکھ روپے جرمانہ یا دونوں سزائیں ہو سکتی ہیں ۔ میٹر ٹمپرنگ کی صورت میں بھی سخت سزائیں شامل کی گئی ہیں ۔ میٹر سست کرانے والے گھریلو صارفین کودفعہ462Jکے تحت 2سال تک قیدِ با مشقت یا 10لاکھ روپے جرمانہ یا دونوں سزائیں ،صنعتی/کمرشل صارفین کو دفعہ462Kکے تحت 3سال تک قیدِ با مشقت یا 60لاکھ روپے جرمانہ یا دونوں سزائیں ، جبکہ زرعی صارفین کو زیرِ دفعہ462Lکے تحت 2سال تک قیدِ با مشقت یا25لاکھ روپے جرمانہ یا دونوں سزائیں ہو سکتی ہیں ۔ اس کے علاوہ بجلی کی ٹرانسمشن و ڈسٹری بیوشن لائنوں اور میٹر کو نقصان پہنچانے والے تخریب کاروں کو دفعہ462Mکے تحت7سال قیدِ با مشقت اور کم ازکم 30لاکھ روپے جرمانہ کی سزا سنائی جا سکے نئے قانون کے نافذ العمل ہونے کے بعد وزارتِ پانی و بجلی اب بجلی چوروں کے خلاف ملک گیر کریک ڈائون کرنے کیلئے خصوصی ٹیمیں تشکیل دے رہی ہے جو پولیس کے ساتھ ملکر ملک بھر میں بجلی چوروں کے خلاف قانون کے تحت فوری اور بلا امتیاز کاروائی عمل میں لائیں گی۔ عوام الناس سے بھی اپیل ہے کہ وہ بھی اپنے ارد گرد بجلی چوروں کی نشاندہی کریں اور ان کی وزارت کی جانب سے قائم کی گئی ہاٹ لائن051-9103888پر اطلاع کریں ۔اطلاع دینے والے کی شناخت کو صیغہ راز میں رکھا جائیگا۔
فرمان الہی
نماز کے اوقات
