ہندوؤں کے جذبات مجروح کرنے پر سلمان خان کیخلاف مقدمہ

13 ستمبر ، 2018

بالی ووڈ کے سلطان سلمان خان کی ہوم پروڈکشن میں بننے والی فلم’لوراتری‘ریلیز سے پہلے ہی مشکلات کا شکار ہوگئی۔

ذرائع کے مطابق ریاست بہار میں اداکار ان کے بہنوئی آیوش شرما سمیت 7 دیگر افراد کے خلاف ہندوؤں کے مذہبی جذبات مجروح کرنے کا مقدمہ درج کردیا گیا ہے۔

بہار کے علاقے مظفرپور کی مقامی عدالت نے سلمان خان، آیوش شرما اور اداکارہ وارینا حسین سمیت 7 افراد کے خلاف ایف آئی آر درج کرنے کا حکم دے دیا۔

ذرائع نے مزید بتایا کہ ایڈووکیٹ سدھیر کمار اوجھا نے سلمان خان اورفلم کے خلاف عدالت میں شکایت درج کراتے ہوئے موقف اختیار کیا کہ فلم کا نام ’لوراتری‘سے ہندوؤں کے جذبات مجروح ہوئےاور مذہبی تہوار کا مذاق اڑایا گیا ہے۔

دوسری جانب رواں سال کے ابتداء میں انتہا پسند ہندو جماعت وشوا ہندو پریشد کے سربراہ آلوک کمار نے بھی فلم کے ٹائٹل پر اعتراض اٹھایا تھا اور کہا تھا کہ ہم فلم کو کسی بھی سینما گھر میں ریلیز ہونے کی اجازت نہیں دیں گے کیونکہ ہم نہیں چاہتے کہ کسی بھی ہندو کے جذبات مجروح ہوں۔

واضح رہے کہ فلم’لوراتری‘سلمان خان کے بہنوئی آیوش شرما کی ڈیبیو فلم ہےجو 5 اکتوبر کو دنیا بھر کے سینما گھروں میں نمائش کے لیے پیش کی جائے گی۔

تازہ ترین