سب سے بڑا ’ڈرامہ کوئین‘ کون؟

19 اکتوبر ، 2018

پاکستان کی سابق اداکارہ وینا ملک نے پاکستان مسلم لیگ (ن) کے صدر اور اپوزیشن لیڈر شہباز شریف کو ’ڈرامہ کوئین‘ کہہ ڈالا، جس کے بعد انہیں سوشل میڈیا پر شدید تنقید کا نشانہ بنایا جارہا ہے۔

سابق میزبان اور متنازعہ اداکارہ وینا ملک نے شہباز شریف کی گزشتہ روز قومی اسمبلی کے اجلاس میں شرکت اور تقریر کرنے پر ٹوئٹ کرتے ہوئے شہباز شریف کو ’’ڈرامہ کوئین‘‘ کہہ ڈالا۔ قائد حزب اختلاف شہباز شریف کے متعلق ٹوئٹ کرنے پر وہ ایک مرتبہ پھر تنازعے کی زد میں آگئیں۔

وینا ملک کے ٹوئٹ کے بعدسماجی رابطے کی ویب سائٹ ٹوئٹرپر صارفین کی ایک بڑی تعداد شہباز شریف کی حمایت میں سامنے آگئی ہے اور وینا ملک کو آڑے ہاتھوں لیتے ہوئے انہیں کھری کھری سنائی جارہی ہے۔

اداکارہ وینا ملک کے ٹوئٹ کے جواب میں ایک صارف نے لکھا کہ ’آپ سے بڑا ڈرامہ کون ہوسکتا ہے اس دنیا میں ۔‘ ایک نور الہدا نامی صارف کا کہنا تھا کہ ’یہ ٹائٹل آپ پر ہی سوٹ کرتا ہے، حقیقی ڈرامہ کوئین آپ ہیں۔‘

کسی نے وینا ملک کو ان کی بگ باس میں کی گئی حرکتیں یاد دلاتے ہوئے کہا آپ سے زیادہ ڈرامہ کوئین کوئی نہیں ہے، تو کسی نے حیرت کا اظہار کرتے ہوئے کہا کہ’ یہ آپ کہہ رہی ہیں؟ ‘

کسی نے شدید غصے کا اظہار کیا اور لکھا کہ ’تمہیں دنیا کا کوئی بھی اچھا ٹائٹل نہیں مل سکتا، تمام گھٹیا ٹائٹل تمہارے پاس ہیں جو کوئی تم سے چھین نہیں سکتا۔‘

ایک منصور علی خان نامی صارف نے لکھا کہ ڈرامہ کوئین کا ٹوئٹ کرنے سے پہلےآپ شیشہ دیکھ لیتیں۔