’بجلی کی قیمتیں جتنی بڑھانی تھیں، بڑھا چکے‘

وزیر پاورڈویژن عمرایوب نے کہا ہے کہ ہم نے بجلی کی جتنی قیمت بڑھانی تھی بڑھادی ہے اس عمل میں بھی 75 فیصد عوام کو ریلیف دیا گیا۔

اسلام آباد میں متبادل توانائی بورڈ کی ورکشاپ سے خطاب میں عمر ایوب نے کہا کہ ہم بجلی پیداوار ہی نہیں ترسیلی مسائل کو بھی حل کر رہے ہیں۔

ان کا کہنا تھا کہ ہمارا این ٹی ڈی سی کا سسٹم ساڑھے 19 ہزار میگا واٹ سے زیادہ بجلی اٹھانے کے قابل نہیں، دور دراز دیہی علاقوں میں شمسی توانائی سے بجلی فراہم کریں گے۔

آئی ایم ایف کے ساتھ مذاکرات کے بارے میں پوچھے گئے سوال پر عمر ایوب نے کہا کہ بجلی کی قیمتوں میں زرعی صارفین،برآمدی صنعتوں کو ریلیف دیا گیا ہے،کے الیکٹرک کو اپنے نظام میں مزید سرمایہ کاری کرنا ہوگی۔