پاکستان کی بھارت کو پھر مذاکرات کی دعوت

22 نومبر ، 2018

پاکستان نے بھارت کو ایک بار پھر ہر طرح کے مذاکرات کی دعوت دیتے ہوئے کہاہےکہ کرتارپورہ میں سکھوں کی مذہبی زیارت کی بحالی کیلئے جلد اچھی پیشرفت سامنے آنے والی ہے ۔

ہفتہ وار بریفنگ میں دفترخارجہ کے ترجمان ڈاکٹر محمد فیصل کا کہنا ہے کہ پولیس آفیسر طاہر داوڑ کی شہادت سے متعلق تحقیقات میں افغانستان تعاون نہیں کر رہا۔

انہوں نے مزید کہا کہ بھارت کے ساتھ ہرقسم کے مذاکرات کے لیے تیار ہیں، کرتار پورہ میں سکھوں کی مذہبی زیارت کی بحالی کے لیے مسلسل کوششیں کی ہیں ، کرتار پورہ کے متعلق جلد اچھی خبر سنائیں گے۔

ترجمان دفتر خارجہ نے مزید کہا کہ شہید پولیس آفیسر طاہر داواڑ کے قتل کی تحقیق کے معاملے پر افغان حکومت کی جانب سے تاحال کوئی معلومات شیئر نہیں کی گئی ہے، البتہ پاکستان میں اس اغوا اور قتل کی تحقیقات جاری ہیں۔

انہوں نے کہا کہ پاکستان مقبوضہ کشمیر میں حالیہ بھارتی جارحیت کی سختی سے مذمت کرتا ہے جبکہ وزیراعلیٰ امرتسر کے بیان کو مسترد کرتا ہے۔

ڈاکٹر فیصل نے بھارتی آرمی چیف کے بیان پر ردعمل کا اظہار کرتے ہوئے کہا کہ انہیں سوچ کر بولنے کی ضرورت ہے۔

ایک سوال کے جواب میں دفترخارجہ کے ترجمان کا کہنا تھا کہ پاکستان نے امریکی صدر ٹرمپ کے بیان کے بعد ریکارڈ کی تصحیح کیلئے ٹوئٹ کیے۔

تازہ ترین