بلوچستان کے محکمہ تعلیم کی جانب سے صوبے بھر کے اسکولز سے غیر حاضر رہنے والے اساتذہ کی معطلی اور متعلقہ اضلاع کے افسران کے خلاف بڑے پیمانے پر کارروائیوں کا سلسلہ جاری ہے۔
سیکرٹری تعلیم بلوچستان طیب لہڑی نے جیو نیوز کو بتایا کہ جمعرات کو مجموعی طور 115 اساتذہ کو معطل کیا گیا، جن میں بارکھان کے 30، لورالائی کے 13، کیچ کے 38، پشین کے 4 اور آواران کے 30 اساتذہ شامل ہیں جبکہ غیر حاضر اساتذہ کو تنخواہوں کی ادائیگی پر 7 ڈی ڈی اوز افسران کو اظہار وجوہ کے نوٹسز جاری کردئیے گئے ہیں۔
سیکرٹری تعلیم نے بتایا کہ 4 روز کے دوران مجموعی طور پر صوبے کے گیارہ اضلاع کے 549 اساتذہ کو طویل غیر حاضری پر معطل کردیا جبکہ ان غیر حاضر اساتذہ کو تنخواہیں دینے پر 41 افسران کو شو کاز نوٹسز جاری کردئیے گئے۔
سیکرٹری تعلیم نے بتایا کہ نظام تعلیم کی بہتری کے لئے تمام تر اقدامات کئے جائیں گے اور اس سلسلے میں کسی بھی رکاوٹ یا اثر و رسوخ کو روکاوٹ نہیں بننے دیا جائے گا۔