امریکی محکمہ خارجہ عمران خان کے دورے سے لاعلم

10 جولائی ، 2019

امریکی محکمہ خارجہ عمران خان کے دورۂ امریکا سے لاعلم

امریکی محکمہ خارجہ کا کہنا ہے کہ معلوم نہیں کہ وزیراعظم عمران خان اس ماہ امریکا کا دورہ کررہے ہیں۔

ترجمان امریکی محکمہ خارجہ مارگن آرٹاگس نے کہا ہے کہ وزیر اعظم عمران خان کے دورے کی تصدیق وائٹ ہاؤس سے کی جائے۔

ترجمان کا یہ بھی کہنا ہے کہ ہمیں وائٹ ہاؤس نے عمران خان کے دورے کی کوئی اطلاع نہیں دی سنا ضرور ہے، عمران خان کے دورے کے متعلق سرکاری طور پر نہیں بتایا گیا، وائٹ ہاؤس سے رابطہ کر کے دورے کی تفصیلات حاصل کریں گے۔

ذرائع وائٹ ہاؤس کا کہنا ہے کہ عمران خان کے دورے سے متعلق بیان آج جاری ہوگا۔

واضح رہے کہ عمران خان کا 3 روزہ دورہ امریکا 21جولائی سے شروع ہوگا اور وہ 22جولائی کو امریکی صدر ڈونلڈ ٹرمپ سے ملاقات کریں گے۔

پاکستانی سفارتخانے نے اب تک عمران خان کے دورے کی تفصیلات نہیں بتائی ہیں۔

خیال کیا جارہا ہے کہ وزیر خارجہ شاہ محمود قریشی، مشیر خزانہ، مشیر تجارت اور کابینہ کے دیگر ارکان بھی وزیر اعظم کے ساتھ دورہ کرنے والے وفد کا حصہ ہوں گے۔

تازہ ترین