قاسم سوری کیخلاف تحریک پر شعبۂ قانون سازی کا اعتراض

13 نومبر ، 2019

ڈپٹی اسپیکر قومی اسمبلی قاسم سوری کے خلاف تحریکِ عدم اعتماد پر اسمبلی کے شعبۂ قانون سازی نے اعتراض اٹھا دیا۔

قومی اسمبلی کے شعبۂ قانون سازی کا کہنا ہے کہ اپوزیشن نے یہ نہیں بتایا کہ ڈپٹی اسپیکر نے کس آئینی شق کی خلاف ورزی کی ہے، یہ بھی واضح نہیں کہ قاسم سوری نے قومی اسمبلی کے کون سے قاعدے کیخلاف ورزی کی ہے۔

شعبۂ قانون سازی کا مزید کہنا ہے کہ جب تک الزام میں واضح آئینی خلاف ورزی کا حوالہ نہ ہو اس تحریک پر کارروائی نہیں کر سکتے۔

قومی اسمبلی کے شعبۂ قانون سازی کے اس اعتراض کےبعد ڈپٹی اسپیکر کے خلاف تحریکِ عدم اعتماد پر رواں اجلاس میں ووٹنگ مشکل ہو گئی ہے۔

یہ بھی پڑھیئے: قاسم سوری ڈپٹی اسپیکر کے عہدے پر بحال

واضح رہے کہ مسلم لیگ نون نے 8 نومبر کو ڈپٹی اسپیکر قومی اسمبلی قاسم سوری کے خلاف تحریکِ عدم اعتماد جمع کرائی تھی، جس پر 15 نومبر کے بعد ووٹنگ لازمی ہے۔

ذرائع کا کہنا ہے کہ حکومت حزبِ اختلاف سے یہ تحریکِ عدم اعتماد واپس لینے کے لیے رابطے کر رہی ہے۔

تازہ ترین