کورونا، نیویارک میں طبی عملے کو خراج تحسین

نیو یارک میں شہریوں نے بالکونیوں اور کھڑکیوں پر کھڑے ہوکر تالیاں بجا کر اور گیت گا کر کورونا وائرس سے متاثر مریضوں کی دیکھ بھال کرنے والے طبی عملے کو خراج تحسین پیش کیا۔

چین کے شہر ووہان سے شروع ہونے والی کورونا وائرس کی نئی قسم نے جس تیزی سے عالمی وبا کی شکل اختیار کرلی ہے اس نے پوری دنیا کو بھی تشویش میں مبتلا کردیا ہے جبکہ وبا کو پھیلنے سے روکنےکے لیے دنیا کے کئی ممالک لاک ڈاؤن ہیں۔

اس خطرناک وبا کا شکار مریضوں کا علاج کرتے ڈاکٹرز و طبی عملہ اپنی ذمہ داریاں بخوبی نبھا رہے ہیں۔ 

ایسے ہی باہمت اور فرض شناس طبی عملے کو خراج تحسین پیش کرنے کے لیے نیویارک کے شہریوں نے اپنے گھروں کی بالکونیوں، کھڑکیوں اور دروازوں پر کھڑے ہو کر تالیاں بجائیں، برتن بجا کر میوزک پرفارمنس دی اور یکجہتی کے گیت گنگنائے۔

واضح رہے کہ کورونا وائرس سے 199 ممالک متاثر ہوچکے ہیں جس میں 27 ہزار 367 اموات اور 6 لاکھ سے زائد افراد متاثر ہوچکے ہیں جبکہ 1 لاکھ 33 ہزار 3 سو 63 مریض صحت یاب ہوچکے ہیں۔