سندھ حکومت نے رواں ماہ ٹڈی دل کے سندھ میں فصلوں پر ممکنہ یلغار کے پیش نظر وفاق سےاس کے خاتمے کے لیے صوبے میں فوری فضائی اسپرے کروانے کا مطالبہ کردیا۔
وزیر زراعت اسماعیل راہو کے مطابق رواں ماہ ٹڈی دل کے سندھ میں فصلوں پر یلغار کریں گے، وفاق ہمیں 6 ایئریل اسپرے جہاز فراہم کرے۔
اسماعیل راہو کا کہنا ہے کہ وفاق کاٹڈی دل کے خاتمے کے لیے نیشنل ایکشن پلان کہیں نظر نہیں آ رہا، جبکہ سندھ کے7 اضلاع میں ٹڈی دل کے بچے یا انڈے موجود ہیں۔
صوبائی وزیر نے کہا کہ گرمیاں آگئی ہیں، ٹڈیوں کا پاکستان میں سمر سیزن شروع ہوچکا ہے، وفاقی ادارہ پلانٹ پروٹیکشن نیند سے بیدار ہو۔
انہوں نے کہا کہ تھرپارکر، عمرکوٹ، سانگھڑ، نوانشاہ، خیرپور، سکھر اور گھوٹکی کے ریگستانی علاقے زیادہ متاثر ہونے کا امکان ہے۔