آسٹریلیا کے قریب سمندر میں سب سے طویل سمندری جانور دریافت

آسٹریلیا میں سائنسدانوں نے پانی کی گہرائی میں تیرنے والا دنیا کا سب سے طویل جاندار دریافت کرلیا ہے۔

یہ ایک طرح کا نیم شفاف سمندری کیڑا ہے جسے Siphonophore کہا جاتا ہے۔ کورال یا مرجان کی طرح اس کا جسم چھوٹے ٹکڑوں پر مشتمل ہوتا ہے اور تنگ سمندری گڑھے میں اسے دھاگے کی طرح تیرتے ہوئے دیکھا گیا ہے۔

درحقیقت چھوٹے چھوٹے اجزا مل کر اس عجیب جانور کی تشکیل کرتے ہیں اور بسا اوقات ان کی لمبائی 130 فٹ تک بھی جا پہنچتی ہے لیکن پہلی مرتبہ اس سے بھی طویل جانور کیمرے سے ریکارڈ کیا گیا ہے۔

اگر اس رسی نما جانور کو سیدھا کیا جائے تو اس کی لمبائی 11 منزلہ عمارت سے بھی زیادہ ہوگی جبکہ اس کی موٹائی جھاڑو کے ڈنڈے جتنی ہوسکتی ہے۔

آسٹریلیا کے قریب ماہرین نے اس پر حیرت کا اظہار کرتے ہوئے اسے دنیا کا سب سے طویل سمندری جاندار قرار دیا ہے جس کی لمبائی 150 فٹ کے قریب ہے۔ ٹیم نے غوطہ خور روبوٹ کی بدولت سمندر کی گہرائیوں میں بہت عجیب و غریب جاندار بھی دریافت کیے ہیں۔

واضح رہے کہ Siphonophore سمندری مخلوق Hydrozoans سے تعلق رکھتے ہیں اور اب تک ان کی 175 سے زائد اقسام دریافت ہوچکی ہیں اور کسی جنسی عمل کے بغیر یہ اپنی تعداد بڑھاتے رہتے ہیں۔