ڈیل آف دی سنچری، اسرائیلی وزیراعظم پر دبائو، اعلان آج ہوگا یا نہیں؟ فلسطینی انضمام کا معاملہ لیکر عالمی عدالت پہنچ گئے

مقبوضہ بیت المقدس(اے ایف پی) امریکی صدر کے منصوبے ڈیل آف سنچری کو لیکر مغربی کنارے کے فلسطینی عالمی عدالت پہنچ گئے جہاں امریکی صدر، نیتن یاہو، پومپیو، ٹرمپ کے داماد کیخلاف کارروائی کی درخواست کی گئی ہے۔

تفصیلات کے مطابق اسرائیلی وزیراعظم پر مغربی کنارے کے انضمام کیلئے دبائو برقرار ہے اور وہ آج اس کا اعلان کرتے ہیں یا نہیں، دوسری جانب اسرائیل کے نائب وزیراعظم نے انضمام کے معاملے پر صبر سے کام لینے کی تجویز دی ہے۔

تفصیلات کے مطابق اسرائیل کے نائب وزیراعظم نے کہا ہے کہ مغربی کنارے کے انضمام کے معاملے پر لازمی انتظار کرنا چاہیے تھا جبکہ خطے کی طاقتیں اور اتحادی بھی اس کی مذمت کررہے ہیں، منگل تک نیتن یاہو کی حکومت کی جانب سے اس پیشرفت کے بارے میں اعلان کرنے سے متعلق کچھ بھی واضح نہیں تھا۔

نیتن یاہو کی حکومت نے یکم جولائی کی تاریخ مقرر کی تھی کہ امریکی صدر ٹرمپ کی جانب سے پیشکش پر آگے بڑھا جاسکے،امریکا کی اس پیشکش کو فلسطینیوں کی جانب سے یکسر مسترد کردیا گیا ہے۔

امریکی حکام سے ملاقات کے بعد نیتن یاہو نے کہا تھا کہ میں نے خودمختاری کے معاملے پر بات کی ہے جس پر ہم کام کررہے ہیں اور آنے والے دنوں میں بھی اس پر کام جاری رکھیں گے،پیر کو نیتن یاہو کے اہم اتحادی،وزیر دفاع اور متبادل وزیراعظم بینی گنتز نے کہا کہ اسرائیل کے کورونا وائرس پر قابو پالینے تک انضمام کے معاملے پر صبر کرنا چاہیے تھا۔دوسری جانب برطانیہ،فرانس اور جرمنی سمیت یورپی طاقتوں اور اقوام متحدہ نے اس اقدام کی یکسر مخالفت کرتے ہوئے اسے عالمی قانون کی خلاف ورزی قرار دیا ہے۔

دریں اثنا دوسری جانب فلسطینی مغربی کنارے کے انضمام کا معاملہ عالمی عدالت لے گئے،جہاں نے انہوں نے انٹرنیشنل کریمنل کورٹ سے درخواست کی کہ انضمام کے معاملے پر ٹرمپ اور نیتین یاہو سے پوچھ گچھ کی جائے،مغربی کنارے کے 4 شہریوں نے انٹرنیشنل کریمنل کورٹ کو بتایا کہ وہ امریکا کے ’’ڈیل آف سینچری‘‘منصوبے کے متاثرہ ہیں۔

درخواست میں فلسطینی شہری نے عالمی عدالت سے کہا کہ ٹرمپ،اسرائیلی وزیراعظم نیتن یاہو،امریکی سیکریٹری خارجہ مائیک پومپیو اور ٹرمپ کے منصوبے ’’ڈیل آف دی سینچری‘‘کے آرکیٹکٹ ٹرمپ کے داماد جیرڈ کشنر کیخلاف تحقیقات کی جائے۔