ورلڈ ٹی20 ملتوی کرکے آئی پی ایل کروایا تو سوال اٹھیں گے، انضمام

پاکستان کرکٹ ٹیم کے سابق کپتان اور چیف سلیکٹر انضمام الحق نے کہا ہے کہ ٹی20 ورلڈ کپ ملتوی کرکے انڈین پریمیئر لیگ ( آئی پی ایل ) منعقد کروائی گئی تو سوال اٹھیں گے۔

ایک بیان میں انضمام الحق نے استفسار کیا کہ اگر ایک ملک لاک ڈاؤن میں آئی پی ایل کرواسکتا ہے تو ورلڈ ٹی20 کیوں نہیں ہوسکتا؟

انہوں نے خدشات کا اظہار کرتے ہوئے کہا کہ آئی سی سی ایونٹ اور سیریز کی جگہ پرائیویٹ لیگ کو ترجیح دی گئی تو کرکٹ کو نقصان ہوگا۔

انضمام الحق نے مزید کہا کہ آسٹریلیا اور نیوزی لینڈ ورلڈ ٹی20 کی مل کر میزبانی کریں تو ایونٹ کا انعقاد ممکن ہوسکتا ہے۔

ان کا کہنا تھا کہ پرائیویٹ لیگ کو انٹرنیشنل کرکٹ پر فوقیت نہیں دی جانی چاہیے۔