-
فرمان الہی
-
نماز کے اوقات
- جمعہ یکم؍ذیقعد 1445ھ 10؍مئی 2024ء
- بانی: میرخلیل الرحمٰن
- گروپ چیف ایگزیکٹووایڈیٹرانچیف: میر شکیل الرحمٰن
فرمان الہی
نماز کے اوقات
اسلام آباد ہائی کورٹ نے پی آئی اے کے پائلٹ کی لائسنس معطلی اور نوکری سے برطرفی کے خلاف درخواست پر سماعت کرتے ہوئے سول ایوی ایشن کے جواب پر عدم اطمینان کا اظہار کیا ہے۔
اسلام آباد ہائی کورٹ نے پی آئی اے اور سول ایوی ایشن اتھارٹی کو جواب جمع کرانے کیلئے آخری مہلت دیتے ہوئے کہا ہے کہ اسسٹنٹ اٹارنی جنرل وضاحت نہ کر سکے کہ ڈی جی سول ایوی ایشن کیوں تعینات نہ ہوسکا؟
چیف جسٹس اسلام آباد ہائی کورٹ اطہر من اللّٰہ نے سول ایوی ایشن حکام سے کہا کہ جو کچھ آپ نے کیا اس سے ملک کے امیج کو بہت نقصان ہوا، آپ نے قومی ایئر لائن کے وقار کو ایسا نقصان پہنچایا جس کا مداوا بھی نہیں ہوسکتا، اہم پوسٹ پر 2 سال سے مستقل ڈی جی کیوں تعینات نہیں کیا؟
انہوں نے کہا کہ ملک کے امیج اور پی آئی اے کو آپ نے نقصان پہنچایا ہے، آپ اس کی وضاحت نہیں کر سکتے، ریاست اس طرح نہیں چلتی، عدالت دیکھنا چاہتی ہے کہ آپ نے قانون کے مطابق کام کیا بھی یا نہیں۔
چیف جسٹس نے کہا کہ آپ نے لاہور ہائی کورٹ کے فیصلے پر بھی درست طریقے سے عمل نہیں کیا، جو کرنا ہے کریں لیکن قانون کے مطابق چلیں پھر آپ الزام عدالتوں پر لگاتے ہیں، کیا یہ گورننس ہے آپ کی؟
سول ایوی ایشن اتھارٹی کے وکیل نے کہا کہ ہم نے اشتہار جاری کیا مگر ابھی تک کوئی تقرر نہیں ہو سکا۔
یہ بھی پڑھیئے: CAA نے اب تک 28 پائلٹوں کے لائسنس منسوخ کئے
چیف جسٹس اسلام آباد ہائی کورٹ اطہر من اللّٰہ نے کہا کہ نیشنل ایئر لائن کا امیج متاثر ہوا ہے، کیا حساس معاملے کو ایسے ڈیل کرتے ہیں؟ سب سے اہم عہدے کا اضافی چارچ سیکریٹری سول ایوی ایشن کو دیا گیا۔
عدالتِ عالیہ نے حکم دیا کہ وفاقی حکومت ہائی کورٹ میں تحریری وضاحت جمع کرائے۔
اسلام آباد ہائی کورٹ نے کیس کی سماعت 8 ستمبر تک ملتوی کر دی۔
