برطرف پائلٹ کی لائسنس بحالی کی درخواست سماعت کیلئے منظور

29 جولائی ، 2020

اسلام آباد ہائی کورٹ نے برطرف پائلٹ سید ثقلین اختر کی لائسنس بحالی کی درخواست سماعت کے لیے منظور کر لی۔

اسلام آباد ہائی کورٹ کے چیف جسٹس اطہر من اللّٰہ نے درخواست پر سماعت کرتے ہوئے سیکریٹری ایوی ایشن، ڈی جی سول ایوی ایشن اتھارٹی، سی ای او پی آئی اے و دیگر کو نوٹس جاری کر دیئے۔

عدالت نے استفسار کیا کہ ڈی جی سی اے اے کی پوسٹ ڈھائی سال سے کیوں خالی ہے؟

درخواست گزار کے وکیل نے عدالت کو بتایا کہ سیکریٹری ایوی ایشن کے پاس ڈی جی سی اے اے کا چارج بھی ہے، سی اے اے کا ہیڈ کواٹر کراچی میں ہے، لیکن یہ وفاقی ادارہ ہے۔

انہوں نے بتایا کہ یہ آرڈر وفاقی حکومت کی مشاورت سے جاری کیا گیا ہے، بورڈ آف انکوائری کمیشن ایکٹ 2017ء کے تحت تشکیل نہیں دیا گیا۔

چیف جسٹس اطہر من اللّٰہ نے کہا کہ ایگزیکٹو انکوائری کرا سکتا ہے، اسے اس کا اختیار ہے۔

درخواست گزار کے وکیل نے درخواست گزار کی جانب سے عدالت میں مؤقف اختیار کیا کہ سی اے اے نے 14 جولائی کو ایئر لائن ٹرانسپورٹ لائسنس منسوخ کیا، سول ایوی ایشن اتھارٹی تاحال میرے خلاف کوئی ثبوت پیش نہیں کر سکی ہے۔

یہ بھی پڑھیئے:۔

اس طرح پائلٹس کی جعلی ڈگری معاملے کی سماعت نہیں کر سکتے: عدالت

انہوں نے مزید کہا کہ پی آئی اے نے مجھے سنے بغیر 21 جولائی کو ملازمت سے برطرف کر دیا، سول ایوی ایشن اتھارٹی نے قواعد کی خلاف ورزی کی ہے۔

عدالتِ عالیہ نے فریقین کو نوٹس جاری کرتے ہوئے کیس کی سماعت 12 اگست تک ملتوی کر دی۔

برطرف پائلٹ سید ثقلین اختر نے لائسنس منسوخی اور ملازمت سے برطرفی چیلنج کر رکھی ہے۔

تازہ ترین