گورنر سندھ کی سربراہی میں توانائی کی صورتحال کے بارے میں جائزہ اجلاس

کراچی ( اسٹاف رپورٹر)گورنر سندھ عمران اسماعیل کی زیر صدارت گورنر ہاؤس میں ہفتے کو صوبے میں توانائی کی صورتحال کے بارے میں اعلی سطح کا اجلاس منعقد ہوا۔اجلاس میں وفاقی وزیر برائے نجکاری محمد میاں سومرو ، وفاقی وزیر بحری امور سید علی زیدی اور وزیر اعظم کے معاون خصوصی برائے توانائی تابش گوہر بھی شریک ہوئے۔اجلاس میں اراکین صوبائی اسمبلی فردوس شمیم نقوی، حلیم عادل شیخ ، خرم شیر زمان اور اشرف قریشی بھی موجود تھے۔وزیر اعظم کے معاون خصوصی تابش گوہر نے گورنر سندھ کو کراچی میں بجلی کی صورتحال اور کے الیکٹرک پر بریفنگ دی۔اجلاس میں حیسکو اور سیپکو کے معاملات بھی زیر غور آئے۔گورنر سندھ نے اس موقع پر کہا کہ بجلی کے پیداواری اور ترسیلاتی نظام میں بہتری وقت کی ضرورت ہے تاکہ صارفین کو بجلی کی مسلسل فراہمی کو یقینی بنایا جاسکے۔