لانگ مارچ، مریم نواز کی مولانا فضل الرحمٰن سے ملاقات

06 فروری ، 2021

مسلم لیگ نون کی نائب صدر اور سابق وزیرِ اعظم میاں نواز شریف کی صاحبزادی مریم نواز نے اپوزیشن اتحاد پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمن سے اسلام آباد میں ملاقات کی ہے۔

ذرائع کے مطابق ملاقات کے دوران دونوں رہنماؤں نے پی ڈی ایم کے اجلاس میں ہونے والے فیصلوں، لانگ مارچ کی تیاریوں، طریقہ کار اور دورانیے پر گفتگو بھی کی۔

ذرائع کا کہنا ہے کہ دونوں نے طے کیا کہ لانگ ما رچ سے متعلق تمام تجاویز کا اسٹیرنگ کمیٹی میں جائزہ لے کر حتمی فیصلہ ہو گا۔

ذرائع نے بتایا کہ ملاقات کے دوران لانگ مارچ کے اسلام آباد پہنچنے پر پہلا پڑاؤ فیض آباد پر ڈالنے کی تجویز دی گئی۔

ذرائع کا مزید کہنا ہے کہ مریم نواز اور مولانا فضل الرحمٰن نے سینیٹ الیکشن میں مشترکہ امیدواروں کی کامیابی یقینی بنانے کی حکمتِ عملی پر بھی گفتگو کی۔

ذرائع نے یہ بھی بتایا ہے کہ نائب صدر نون لیگ اور پی ڈی ایم کے سربراہ نے اس بات پر بھی غور کیا کہ تحریکِ عدم اعتماد پہلے پنجاب سے لائی جائے یا بلوچستان سے، جبکہ پیپلز پارٹی کی تجاویز پر بھی غور کیا گیا۔

تازہ ترین