• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

روشن ڈیجیٹل اکاؤنٹ کے ذریعے 500 ملین امریکی ڈالرز سے زائد ترسیلات زر کی گئیں، ظہیراے جنجوعہ

برسلز(حافظ انیب راشد ) سفارت خانہ پاکستان برسلز نے حبیب بینک لمیٹڈ اور اسٹیٹ بینک آف پاکستان کے اشتراک سے 6 مارچ 2021 کو "روشن ڈیجیٹل اکاؤنٹ" (آر ڈی اے) پر ایک ویبنار کا اہتمام کیا۔ یہ ویبنار آر ڈی اے اسکیم کی خصوصیات اور فوائد کے بارے میں بلجیم اور لکسمبرگ میں مقیم پاکستانی کمیونٹی میں شعور بیدار کرنے کے لئے ترتیب دیا گیا تھا۔ ویبنار سے بلجیم ، لکسمبرگ اور یوروپی یونین میں پاکستان کے سفیر ظہیر اے جنجوعہ ، ایچ بی ایل کے چیف آپریٹنگ آفیسر صغیر مفتی اور اسٹیٹ بینک کے منیجنگ ڈائریکٹر سید عرفان علی نے خطاب کیا۔ اس موقع پر گفتگو کرتے ہوئے سفیر پاکستان ظہیر جنجوعہ نے روشن ڈیجیٹل اکاؤنٹ کو حکومت کا ایک بروقت اقدام قرار دیا ، جو بیرون ملک مقیم پاکستانیوں کو بینکاری کی ایک مکمل رینج کی فراہمی کے ذریعے پاکستانی بینکاری اور ڈیجیٹل ادائیگی کے نظام میں ضم کر رہا ہے ۔ انہوں نے بتایا کہ اس اقدام سے پچھلے 5 ماہ کے دوران دنیا بھر میں 94000 اکاؤنٹ کھولے گئے۔ جنکے ذریعے 500 ملین امریکی ڈالر سے زیادہ کی ترسیلات زر کی گئی ہیں ۔ سفیرپاکستان نے مزید کہا کہ رواں مالی سال (2020-21) کے پہلے سات ماہ کے دوران بلجیم اور لکسمبرگ سے ترسیلات 305.6 فیصد اضافے کے بعد 136.4 ملین امریکی ڈالر تک جا پہنچی ہیں ۔ سفیرپاکستان نے ترسیلات زر کے بہاؤ میں ریکارڈ اضافے پر پاکستانی کمیونٹی کا شکریہ ادا کیا اور امید کی کہ یہ رجحان آئندہ بھی جاری رہے گا۔ چیف آپریٹنگ آفیسر ، ایچ بی ایل ، صغیر مفتی نے اس اقدام کے تحت متعدد فوائد کے بارے میں بات کی۔جبکہ منیجنگ ڈائریکٹر اسٹیٹ بینک سید عرفان علی نے بھی روشن ڈیجیٹل اکاؤنٹ کی اہم خصوصیات اور فوائد کے بارے میں تفصیلات بیان کی۔ اس ورچوئل تبادلہ خیال میں بلجیم اور لکسمبرگ میں مقیم پاکستانی باشندوں نے بڑی تعداد میں شرکت کی جس میں بینکر ، مالیاتی ماہرین ، کاروباری افراد ، طلباء اور میڈیا سے وابستہ لوگ شامل تھے۔ شرکاء نے بحث میں فعال طور پر حصہ لیا ، اسکیم کے بارے میں سوالات پوچھے اور اس اقدام کی تعریف کی۔ یاد رہے کہ وزیر اعظم عمران خان نے روشن ڈیجیٹل اکاؤنٹ اسکیم کا افتتاح ستمبر 2020 میں لاکھوں غیر مقیم پاکستانیوں کو بینکاری کی جدید سہولیات کی فراہمی کے لئے کیا تھا-

تازہ ترین