فرمان الہی
نماز کے اوقات
برطانیہ نے پاکستانی ایئر لائنز پر طویل عرصے سے عائد پابندیاں ختم کر دیں۔
برطانوی ہائی کمیشن کا کہنا ہے کہ پاکستانی ایئر لائنز اب برطانیہ کے لیے پروازوں کی درخواست دے سکتی ہے۔
برطانوی ہائی کمیشن کے مطابق ایئرلائنز کو پروازوں کے لیے یو کے سی اے اے سے اجازت لینا ہوگی۔
برطانوی ہائی کمشنر جین میریٹ نے کہا کہ سیفٹی لسٹ سے اخراج آزاد اور تکنیکی عمل کے تحت ہوا، میں پاکستانی ایئر لائنز سے سفر کی منتظر ہوں، پاکستانی اور برطانوی ماہرین کی مشترکہ کاوشوں سے عالمی حفاظتی معیار کو حاصل کیا گیا۔
انہوں نے کہا کہ پاکستان کے ساتھ فضائی رابطوں میں بہتری خاندانوں کے ملاپ میں مدد دے گی۔
برطانوی ایئر سیفٹی کمیٹی نے کہا کہ 2021ء کے بعد سے پاکستان نے فضائی حفاظتی معیار میں نمایاں بہتری کی۔
واضح رہے کہ مئی 2020ء میں کراچی میں پی آئی اے کے طیارے کو پیش ہونے والے حادثے کے بعد اس وقت کے وزیر ہوا بازی نے پارلیمنٹ کو بتایا تھا کہ ہمارے ملک کے ایک تہائی کمرشل پائلٹس کے پاس بوگس ڈگریاں ہیں جس کے بعد جون 2020ء میں برطانیہ اور یورپ کے لیے پاکستانی پروازوں پر پابندی عائد کر دی گئی تھی۔
حکومت کی مسلسل کوششوں کے بعد گزشتہ برس نومبر میں یورپی یونین نے پاکستانی ائیر لائن کی یورپ کے لیے پروازوں پر سے پابندی اٹھا لی تھی تاہم اب برطانیہ نے بھی پاکستانی ایئر لائنز پر عائد پابندی ہٹا لی ہے۔
