بالی ووڈ کے ٹھیکے دار روپوش ہیں، لیکن میں انڈسٹری کو بچاؤں گی، کنگنا رناوت

بالی ووڈ کی متنازع بیانات دینے کے حوالے سے مشہور اداکارہ کنگنا رناوت کی فلم تھلیوی اپنی 23 اپریل کی ریلیز کی تاریخ کی جانب بڑھ رہی ہے، اس کے باوجود کہ دیگر فلم پروڈیوسر موجودہ وبائی صورتحال میں اپنی فلموں کی ریلیز کی تاریخ میں تاخیر کررہے ہیں۔

اس سال کے شروع میں بہت سارے فلم سازوں نے بڑے بولڈ انداز میں اپنی فلموں کی ریلیز کی تاریخ دی تھی، لیکن اب کورونا وائرس کی وبا کے بھارت میں بڑھتے ہوئے اثرات کے تناظر میں ان فلموں کے اجرا میں تاخیر کررہے ہیں۔

تاہم تھلیوی کے فلم ساز اپنی دی گئی اصل تاریخ پر ہی فلم کی ریلیز پر قائم ہیں۔ اس صورتحال پر کنگنا نے ٹوئٹر پر کہا کہ ان کی یہ مووی فلم بینوں کو تھیٹرز کی جانب واپس لائے گی۔

انھوں نے اس موقع پر فلم پروڈیوسرز کرن جوہر اور ادیتیا چوپڑا کا نام لے کر کہا کہ مجھے فلم انڈسٹری سے باہر کرنے کے لیے سب کچھ کیا، گینگ بنائے، خوفزدہ کیا، لیکن میں آج کہتی ہوں کہ بالی ووڈ کے ٹھیکے دار کرن جوہر اور ادیتیا چوپڑا روپوش ہیں۔ تمام بڑے ہیرو چھپے ہوئے ہیں۔ لیکن کنگنا اپنی ٹیم کے ساتھ سو کروڑ کے بجٹ کی فلم لیکر آرہی ہے تاکہ بالی ووڈ کو بچایا جاسکے۔

انھوں نے کہا کہ تاریخ سنہری الفاظ میں یہ لکھے گی کہ ایک عورت جو کہ باہر کی اور سوتیلی تھی، اس کی تقدیر میں بچانے والا لکھا گیا، آپ کو نہیں معلوم زندگی ہمیں کئی طرح سے حیران کرتی ہے۔ اگر یہ ہوگیا تو یاد رکھیں بالی ووڈ کی چلر پارٹی آئندہ آپکی ماں پر دوبارہ حملہ آور نہیں ہوگی، کیوں کہ ماں، ماں ہوتی ہے۔