شعیب اختر جیت کی خوشی میں غلطی کرگئے؟

15 اپریل ، 2021

پاکستان کرکٹ ٹیم کے سابق فاسٹ بالر اور تجزیہ کار شعیب اختر نے جنوبی افریقا کے خلاف سیریز کا فیصلہ آنے سے پہلے ہی پاکستان ٹیم کو سیریز جتوادی۔

شعیب اختر نے جنوبی افریقا کے خلاف تیسرے ٹی ٹوئنٹی میں پاکستان کی شاندار فتح کے بعد ٹوئٹر پر کپتان بابر اعظم کی تعریف کرتے ہوئے لکھا کہ پاکستان ایک اور سیریز جیت گیا۔

شعیب اختر نے اپنی ٹوئٹ ڈیلیٹ نہیں کی تاہم نشاندہی ہونے پر انہوں نے تسلیم کرتے ہوئے ایک اور پیغام لکھا کہ غلطی بھی بندے سے ہی ہوتی ہے۔

واضح رہے کہ پاکستان نے جنوبی افریقا کو تیسرے ٹی ٹوئنٹی میچ میں 9 وکٹ سے ہرایا تھا جس کے بعد قومی ٹیم نے اب 4 میچوں کی سیریز میں دو ایک سے برتری حاصل کرلی ہے۔

پاکستان اور جنوبی افریقا کے درمیان سیریز کا آخری ٹی ٹوئنٹی میچ کل کھیلا جائے گا۔ قومی ٹیم جیت کی صورت میں سیریز جیت لے گی جبکہ جنوبی افریقا کی جیت سے سیریز کا اختتام برابری پر ہوگا۔

تازہ ترین