ہرارے ٹیسٹ،پاکستان 426 پر آؤٹ ، 250 رنز کی برتری حاصل

ہرارے میں پاکستان اور زمبابوے کے درمیان کھیلے جارہے پہلے ٹیسٹ میچ میں قومی ٹیم پہلی اننگز میں 250 رنز کی برتری کے ساتھ 426 رنز بنا کر آؤٹ ہو گئی۔

قومی کرکٹ ٹیم کے مڈل آرڈر بیٹسمین فواد عالم 140رنز بناکر آؤٹ ہوئے۔ مہمان ٹیم نے تیسرے روز کے کھیل کا آغاز 6 وکٹ پر 374 رنزپر کیا۔ پاکستان  کی ساتویں وکٹ 395 رنز پر گر گئی، حسن علی 30 رنز بنا کر آؤٹ ہوئے۔

فواد عالم نے 55 سالہ پرانا ریکارڈ برابر کردیا

قومی کرکٹ ٹیم کے بیٹسمین فواد عالم نے ہرارے ٹیسٹ...

پاکستان کی آٹھویں وکٹ 395 رنز پر گری جب کہ نعمان علی بغیر کوئی رن بنائے آوٹ ہوئے۔

اس سے قبل  ہوم ٹیم پہلی اننگز میں 176 رنز بنا کر آؤٹ ہوگئی تھی۔ پاکستانی بولرز نے کمزور حریف زمبابوے کے بیٹسمینوں کو کھل کر کھیلنے کا موقع نہ دیا۔

پاکستانی فاسٹ بولرز شاہین شاہ آفریدی اور حسن علی نے زمبابوین بیٹنگ لائن کو مشکلات سے دوچار کیے رکھا۔

شاہین شاہ نے ایک اور اہم سنگِ میل عبور کرلیا

شاہین شاہ آفریدی نے لیجنڈری کرکٹر وسیم اکرم کا ٹیسٹ کرکٹ میں 16 میچز میں ریکارڈ 50 وکٹیں حاصل کرنے کا ریکارڈ برابر کردیا۔

دونوں اسٹار بولرز نے 4، 4 وکٹیں بھی حاصل کیں جبکہ ایک وکٹ نعمان علی کے حصے میں آئی۔

زمبابوے کی جانب سے روئے کائیا 48، ڈونلڈ ٹریپانو 28 اور ملٹن شومبا 27 رنز بنا کر نمایاں رہے۔

پاکستان اور زمبابوے کے درمیان پہلا کرکٹ ٹیسٹ جیوسوپر سے براہ راست دکھایا جارہا ہے۔

خیال رہے کہ ٹیسٹ سریز سے قبل قومی ٹیم نے زمبابوے کو ٹی ٹوئنٹی سیریز میں 1-2 سے شکست دی تھی۔