• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ملک بھر میں احتیاطی تدابیر کے بغیر نماز عید کے اجتماعات

کراچی، حیدرآباد، لاہور، ملتان، فیصل آباد، گوجرانوالہ، پشاور، کوئٹہ اور اسلام آباد سمیت ملک بھر میں نماز عید کے اجتماعات ہو رہے ہیں۔

اس موقع پر حکومت کی لوگوں کو ماسک پہن کر مسجد آنے اور سماجی فاصلہ رکھ کر نماز ادا کرنے کی ہدایات پر عمل نہ ہونے کے برابر ہے۔

اجتماعات میں بچے اور معمر افراد بھی آئے، لوگ گلے مل کرمبارک باد دیتےرہے۔

مختلف شہروں میں نماز عید کے اجتماعات کی صورتحال

کراچی:

کراچی کےمختلف مقامات پر  نماز عید کےا جتماعات جاری ہیں، گرومندر پر سبیل والی مسجد میں نماز عید ادا کی گئی جہاں شہریوں کی بڑی تعداد موجود تھی تاہم زیادہ تر نمازیوں نے ماسک پہنے ہوئے تھے۔

لاہور:

لاہور کی جامع مسجد باغ جناح میں نماز عیدالفطر ادا کردی گئی۔مینار پاکستان گراونڈ میں بھی نماز عیدالفطر ادا کی گئی۔ علامہ ابتسام الہی ظہیر نے نماز پڑھائی۔

لاہور کے جامعہ نعیمیہ میں بھی نماز عید کااجتماع ہوا، مفتی راغب نعیمی نے نماز پڑھائی۔

منصورہ میں بھی نماز عید الفطر کا اجتماع ہوا ،جہاں امیر جماعت اسلامی سراج الحق نے نماز پڑھائی۔

مختلف مساجد میں نماز عید کی ادائیگی کے موقع پر کورونا ایس اوپیز کی خلاف ورزی دیکھنے میں آئی۔

لاہور : جامعه مسجد بحریہ ٹاؤن میں نماز عید کی ادائیگی کردی گئی، وزیراعظم کے نمائندہ خصوصی حافظ طاہر محمود اشرفی نے نماز عید کی امامت کی۔

نماز عيد كے اجتماع میں مظلوم كشميريوں اور فلسطينيوں کیلئے خصوصى دعا کی گئی۔

لاہور : پاکستان سمیت کل عالم کیلئے كورونا كى وبا سےنجات كى بھی دعا کروائی گئی

مسلم لیگ (ن) کے صدر شہبازشریف نے عید الفطر کی نماز ماڈل ٹاؤن میں ادا کی، پنجاب اسمبلی میں اپوزیشن لیڈر حمزہ شہباز شریف بھی موجود تھے۔

نماز کے بعد ملکی سلامتی, کشمیر، فلسطین اور مسلم امہ کیلئے خصوصی دعائیں کی گئیں۔

کوئٹہ:

کوئٹہ میں عیدگاہوں، جامع مساجد عیدالفطر کے اجتماعات کی سیکیورٹی اورکورونا ایس اوپیز پرعملدرآمد کے لیے انتظامات کیے گئے۔

ترجمان پولیس کے مطابق شہرمیں 493 مقامات پر نمازعید کےاجتماعات ہوں گے، نماز عید کا سب سے بڑا اجتماع مرکزی عیدگاہ طوغی روڈ پر ہوگا۔

راولپنڈی: 

راولپنڈی کی لیاقت باغ میں نماز عید الفطر ادا کردی گئی، نماز عید الفطر کی امامت مہتمم مدرسہ تعلیم القرآن مولانا اشرف نے پڑھائی۔

بہاول پور: 

ضلع بھرمیں 414 عیدگاہوں، مساجد، عیدگاہوں میں اجتماعات ہوئے، اس موقع پر سیکیورٹی کےلیے15 سو سے زائد پولیس اہلکار تعینات ہیں۔

نوشہرہ:مرکزی عید گاہ ماناخیل سمیت درجنوں عیدگاہوں اورمساجد میں نمازعید ادا کردی گئی۔نمازیوں کی جانب سے کورونا ایس اوپیز کی خلاف ورزی دیکھنے میں آئی۔

فیصل آباد:

 ضلع بھر میں 1070 مقامات پرنماز عیدالفطر کے اجتماعات ہوں گے، اس موقع پر سیکورٹی کےلیے 4 ہزار سے زائد پولیس اہلکار تعینات ہیں۔


قومی خبریں سے مزید