فرمان الہی
نماز کے اوقات
شوبز انڈسٹری کی سینئر اداکارہ بشریٰ انصاری نے کہا ہے کہ اُنہیں اپنی بہن سبنل شاہد کو کھودینے کے بعد اندازہ ہوا کہ عالمی وبا کورونا وائرس کس قدر خطرناک ہے۔
بشریٰ انصاری نے اپنے آفیشل انسٹاگرام اکاؤنٹ پر اُن تمام مداحوں اور دوستوں کے لیے خصوصی ویڈیو پیغام جاری کیا ہے جنہوں نے اُن کی مرحومہ بہن کے لیے دُعائیں کیں۔
اداکارہ نے اپنے ویڈیو پیغام میں کہا کہ ’کچھ دن پہلے ہم نے کورونا وائرس کی وجہ سے اپنی بہن سنبل شاہد کو کھودیا۔‘
اُنہوں نے کہا کہ ’ہمیں کورونا وائرس کے حوالے سے بہت سی معلومات دی جاتی ہے لیکن ہمیں سمجھ اُس وقت آتا ہے کہ جب ہم اس وائرس کی وجہ سے اپنے کسی پیارے کو کھو دیتے ہیں۔‘
بشریٰ انصاری نے کہا کہ ’ہمیں بھی سنبل کے انتقال کے بعد اندازہ ہوا کہ کورونا وائرس کس قدر خطرناک ہے۔‘
اداکارہ نے اپنے مداحوں سے مخاطب ہوتے ہوئے کہا کہ ’اس مشکل گھڑی میں آپ سب نے ہم چاروں بہنوں کو بہت سپورٹ کیا جس کے لیے میں آپ سب کی شُکرگزار ہوں۔‘
اُنہوں نے مزید کہا کہ ’بہن بھائیوں کا رشتہ بہت ہی انمول ہوتا ہے اور ہم چاروں بہنوں میں بھی بہت زیادہ محبت تھی۔‘
واضح رہے کہ عالمی وبا کورونا کا مقابلہ کرنے والی پاکستان کی نامور اداکارہ سنبل شاہد گزشتہ دنوں انتقال کر گئیں وہ اداکارہ بشری انصاری اور اسما عباس کی بہن تھیں۔
سنبل شاہد کو ایک ماہ پہلے کورونا ہوا تھا اور بشریٰ انصاری اور اسما عباس نے عوام سے اپنی بہن کی صحتیابی کیلئے کئی بار دعائوں کی درخواست بھی کی تھی۔
خیال رہے کہ سنبل شاہد نے جیو کے مقبول ڈراموں ملکہ عالیہ، عشقہ وے میں کام کیا تھا، اس کے علاوہ سنبل شاہد نے جیو کی ڈرامہ سیریل تاکے کی آئیگی بارات میں تاکے کی ماں کا مقبول کردار نبھایا تھا۔
