مہندر سنگھ دھونی کی فلموں میں انٹری، گلشن گروور کو بیروزگار ہونیکا خوف

ممبئی (مانیٹرنگ ڈیسک)بولی وڈ کے ʼبیڈ بوائے ولن 65 سالہ گلشن گروور نے سابق کرکٹر مہندر سنگھ دھونی کو اپیل ہے کہ وہ فلموں میں ولن کے کرداروں کی پیش کش قبول نہ کریں۔ہندوستان ٹائمز کے مطابق گلشن گروور نے سابق کرکٹر اور اداکاری میں ڈیبیو کرنے والے مہندر سنگھ دھونی کو ٹوئٹ کے ذریعے پیغام میں کہا کہ انہیں فلموں میں منفی کردار ادا نہیں کرنے چاہیے۔

گلشن گروور نے مہندر سنگھ دھونی کے نئے ہیئر اسٹائل کی تصاویر شیئر کرتے ہوئے انہیں مزاحیہ انداز میں کہا کہ وہ اگر ولن کے کرداروں کی پیش کش قبول کریں گے وہ بے روزگار ہوجائیں گے۔

اداکار نے اپنی ٹوئٹ میں مزید لکھا کہ پہلے ہی سنیل شیٹھی، جیکی شروف اور سنجے دت جیسے لوگوں ان کی روزی پر لات مار رکھی ہے اور ان سے ولن کے کردار چھین لیے گئے ہیں۔انہوں نے مزاحیہ انداز اپناتے ہوئے لکھا کہ اگر دھونی نے بھی ولن کے کرداروں کی پیش کش کی تو وہ بے روزگار ہوجائیں گے۔

ساتھ ہی گلشن گروور نے ہیئر اینڈ ٹیٹو اسٹائلسٹ کو بھی ٹوئٹ میں مینشن کرتے ہوئے انہیں بتایا کہ ان کے لیے ایک اور صارف آ رہا ہے۔

یاد رہے کہ اگست 2020 میں عالمی کرکٹ سے ریٹائرمنٹ لینے والے مہندر سنگھ نے بتایا تھا کہ جلد ہی وہ اپنی اہلیہ کی جانب سے بنائے گئے پروڈکشن ہاؤس کے بینر تلے بننے والی اینمیٹڈ جاسوس ویب سیریز ’کیپٹن 7‘ میں دکھائی دیں گے۔

’کیپٹن 7‘ نامی سیریز کا پہلا سیزن آئندہ برس ریلیز کیے جانے کا امکان ہے لیکن ابھی یہ واضح نہیں کہ مذکورہ سیریز کی کاسٹ میں اور کون کون شامل ہیں۔خیال کیا جا رہے کہ مذکورہ ویب سیریز کے بعد مہندر سنگھ دھونی فلموں میں بھی دکھائی دیں گے اور ممکنہ طور پر وہ منفی کردار ادا کرتے دکھائی دیں گے لیکن اس حوالے سے کچھ بھی کہنا قبل از وقت ہے۔