شاہد آفریدی کا عمر شریف کو جلد از جلد امریکی ویزا جاری کرنے کا مطالبہ

12 ستمبر ، 2021

پاکستان کرکٹ ٹیم کے سابق کپتان شاہد آفریدی نے وزیراعظم پاکستان عمران سے مطالبہ کیا ہے کہ لیجنڈری اداکار و کامیڈین عمر شریف کو امریکی ویزا جاری کرنے کے عمل کو تیز کیا جائے۔

شاہد آفریدی نے مائیکرو بلاگنگ ویب سائٹ ٹوئٹر پر وزیراعظم سے سینئر اداکار عمر شریف کو جلد از جلد امریکی ویزا جاری کرنے کا مطالبہ کیا ہے۔

انہوں نے اپنے ٹوئٹ میں لکھا کہ ’وہ وزیرِاعظم عمران خان سے اپیل کرتے ہیں کہ قوم کے اثاثے عمر شریف کے لیے امریکی ویزا جاری کرنے کے عمل کو تیز کریں، جوکہ بہت نازک حالت میں ہیں اور انہیں فوری علاج کی ضرورت ہے۔‘

شاہد آفریدی نے مزید لکھا کہ ’انہوں نے امریکا میں ڈاکٹروں سے بات کی ہے اور وہ علاج کرنے کے لیے تیار ہیں۔‘

انہوں نے لکھا کہ ’ہمارے پاس امید ہے لیکن نازک وقت ہے اور اس معاملے میں آپ کی فوری توجہ قابل تعریف ہوگی۔‘

یاد رہے کہ سینئر اداکار و کامیڈین عمر شریف کی جانب سے وزیر اعظم عمران خان سےاپنے بہتر علاج کے لیے مدد کی اپیل کی گئی ہے۔

عمر شریف کی جانب سے وزیر اعظم عمران خان سے مدد کی اپیل کرتے ہوئے کہا گیا ہے کہ ’اُن کا علاج چل رہا ہے، اُنہیں ڈاکٹرز نے کہا ہے کہ آپ کا بہتر علاج امریکا میں ہو سکتا ہے، آ پ کو باہر ملک میں جا کر علاج کروانا چاہیے۔‘

جس کے بعد وزیرِ اعظم آفس کی جانب سے عمر شریف اور ان کے اہلِ خانہ کو بہتر علاج کے لیے مدد کی مکمل یقین دہانی کروائی گئی ہے۔

اس حوالے سے عمر شریف کی اہلیہ زرین عمر نے میڈیا سے گفتگو میں کہا کہ عمر شریف کو امریکا میں علاج کے لیے بذریعہ طیارہ ہی لے جایا جاسکتا ہے، وزیراعظم آفس سے کہا گیا کہ ویزے کے لیے کوشش کی جارہی ہے، امید ہے ویزا جلد جاری ہو جائے گا۔

واضح رہے کہ لیجنڈری اداکار و کامیڈین عمر شریف کافی عرصے سے دل کی تکلیف کے ساتھ دیگر تکالیف میں مبتلا ہیں جبکہ ان کی یاداشت بھی خراب ہو گئی ہے، گزشتہ دنوں سوشل میڈیا پر ان کی تشویشناک حالت کے حوالے سے بھی خبریں گردش کر رہی تھیں۔

تازہ ترین