وزارت دفاع نے کنٹونمنٹ الیکشن کا ڈیٹا فراہم کیا: چیف الیکشن کمشنر

14 ستمبر ، 2021

چیف الیکشن کمشنر سکندر سلطان راجہ کا کہنا ہے کہ چاروں صوبوں کے کنٹونمنٹ میں ہونے والے بلدیاتی انتخابات سے متعلق وزارتِ دفاع نے سارا ڈیٹا فراہم کیا۔

یہ بات چیف الیکشن کمشنر سکندر سلطان راجہ نے بلوچستان میں بلدیاتی انتخابات کے حوالے سے ہونے والی سماعت کے دوران کہی۔

انہوں نے کہا کہ تمام صوبے بلدیاتی انتخابات کا انعقاد کریں، یہ قانونی ذمے داری ہے۔

ایڈووکیٹ جنرل بلوچستان نے دورانِ سماعت بتایا کہ بلدیاتی انتخابات کے قانون میں ترمیم کر چکے، کابینہ سے منظوری لینی ہے۔

انہوں نے کہا کہ وزیرِ اعلیٰ بلوچستان کو کہا ہے کہ بلدیاتی انتخابات کے لیے آرڈیننس جاری کریں، بلوچستان میں نئے حلقے بننے ہیں، 3 ہفتے کی مہلت دی جائے۔

چیف الیکشن کمشنر سکندر سلطان راجہ نے کہا کہ قانون اور آئین گنجائش نہیں دیتا کہ ہم بلدیاتی انتخابات مؤخر کریں، ہم عام آدمی کو مقامی حکومت سے محروم نہیں کر سکتے۔

انہوں نے یہ بھی کہا کہ بلوچستان میں بلدیاتی انتخابات سے متعلق 4 ہفتے بعد سماعت کریں گے، الیکشن کمیشن بلدیاتی انتخابات سے متعلق اپنا آرڈر جاری کرے گا اور اس حوالے سے تاخیر نہیں کرے گا۔

چیف الیکشن کمشنر سکندر سلطان راجہ نے بلوچستان میں بلدیاتی انتخابات کے حوالے سے سماعت 14 اکتوبر تک ملتوی کر دی۔

تازہ ترین