فرمان الہی
نماز کے اوقات
امریکی محکمہ انصاف نے واضح کیا ہے کہ وہ بدنام زمانہ جنسی مجرم جیفری ایپسٹین سے متعلق تمام دستاویزات ایک ساتھ جاری نہیں کرے گا۔
حالیہ قانون کے تحت امریکی محکمہ انصاف کو ایپسٹین کے کیسز سے متعلق بڑی تعداد میں دستاویزات عوام کے سامنے لانا ہوں گی تاہم اس قانون میں یہ اجازت بھی دی گئی ہے کہ متاثرین کی ذاتی معلومات اور کسی جاری تفتیش کو نقصان پہنچانے والا مواد روکا جا سکتا ہے۔
امریکی محکمہ انصاف کے مطابق آئندہ جمعے کو لاکھوں دستاویزات جاری کی جائیں گی لیکن یہ تمام ریکارڈز خفیہ دستاویزات پر مشتمل نہیں ہوں گے۔
امریکی نائب اٹارنی جنرل ٹوڈ بلانش نے بتایا ہے کہ ابتدائی طور پر کئی لاکھ دستاویزات منظرِ عام پر لائی جائیں گی جبکہ آئندہ چند ہفتوں میں مزید فائلیں بھی جاری کی جائیں گی۔
ٹوڈ بلانش کا کہنا تھا کہ دستاویزات کے اجراء میں اس بات کو یقینی بنایا جا رہا ہے کہ ہر متاثرہ فرد کا مکمل تحفظ کیا جائے۔
اُنہوں نے مزید کہا کہ ان فائلوں پر عوام کی بڑی تعداد کی غیر معمولی توجہ ہے اس لیے محکمہ احتیاط سے کام لے رہا ہے۔
واضح رہے کہ حالیہ قانون کے تحت تمام مطلوبہ ریکارڈز جاری نہ کرنے کی صورت میں حکومت قانونی دباؤ کا سامنا کر سکتی ہے تاہم اس کی ممکنہ سزا یا نتائج اب تک واضح نہیں ہو سکے ہیں۔
