گزشتہ روز کراچی کے علاقے نیو کراچی میں چھریوں کے وار سے بے رحمی سے قتل کی گئی مقتولہ صبا ایک کیس کی پیروی کے سلسلے میں سٹی کورٹ جا رہی تھی، اس کے قتل کا ملزم محلے دار غضنفر تاحال مفرور ہے۔
پولیس حکام کے مطابق گزشتہ روز راستے میں شقی القلب محلے دار غضنفر نے چھری کے وار سے صبا کو قتل کر دیا تھا۔
پولیس حکام نے امکان ظاہر کیا ہے کہ ملزم نے مقتولہ کو چند روز قبل ہونے والے معمولی جھگڑے کی وجہ سے قتل کیا ہے۔
پولیس نے ملزم کے 2 بھائیوں احسن اور دانش کو حراست میں لے کر تفتیش شروع کر دی ہے۔
نیو کراچی میں لڑکی صبا کے قتل کا مقدمہ نامزد ملزم غضنفر کے خلاف تھانہ بلال کالونی میں سرکاری مدعیت میں درج کیا گیا ہے۔
پولیس کا کہنا ہے کہ مقدمے میں قتل کی دفعہ شامل کی گئی ہے اور نامزد مفرور ملزم کی تلاش جاری ہے۔
واضح رہے کہ گزشتہ روز 20 سالہ صبا دختر اسلم کو نیو کراچی میں اس کے گھر کے قریب دفتر جاتے ہوئے چھریوں کے وار کر کے قتل کر دیا گیا تھا۔