جمعہ کے روز پارلیمنٹ ہائوس میں پاناما پیپرز کمیشن کی تشکیل کے لئے ضوابط کار تشکیل دینے کے لئے حکومت اوراپوزیشن کی بارہ رکنی کمیٹی کا ساتواں اجلاس کسی بھی جانب سے کوئی ادنیٰ سی لچک نہ دکھانے کے باعث ایک بار پھر ڈیڈلاک کا شکار ہونے کے بعد ختم ہوگیا جس میں ہر دو اطراف کی جانب سے ایک دوسرے پر اپنے موقف کو سخت تر کرنے کے الزامات بھی لگائے گئے اگرچہ اس کا ایک اجلاس ابھی ہونا باقی ہے اور ممکن ہے ان سطور کی اشاعت تک اس حوالے سے کوئی حتمی فیصلہ سامنے آجائے لیکن نظربظاہر یہی دکھائی دیتا ہے کہ اب تک ان مذاکرات میں کوئی پیش رفت نہ ہونے کا جو تاثر موجود ہے آئندہ بھی اس میں کوئی تبدیلی ہوتی دکھائی نہیں دیتی کیونکہ اس اجلاس کے بعد مختلف قائدین نے اب تک کی صورت حال کی جو عکاسی کی ہے اس سے یہی محسوس ہوتا ہے کہ اپوزیشن حکومت کی جانب سے پیش کردہ 4نئی شرائط میں سے 3کو من و عن تسلیم کر لینے اور ایک میں تھوڑی سی ترمیم تجویز کرنے کے باوجود حکومتی وفد جس طرح اپنی سابقہ پوزیشن پر لوٹ گیا ہے اور وہ اس میں کسی ایسے اشارے کو بھی تسلیم کرنے پر آمادہ نہیں جو کسی طرح وزیراعظم کو اپنی لپیٹ میں لے لے تو اس سے صاف ظاہر ہوتا ہے کہ معاملات خرابی بسیار کی طرف ہی بڑھتے دکھائی دے رہے ہیں اور شاید یہی وجہ ہے کہ پاکستان مسلم لیگ (ق) کے نمائندے طارق بشیر چیمہ اور پی ٹی آئی کے شاہ محمود قریشی نے کوئی لگی لپٹی رکھے بغیر یہ کہہ دیا ہے کہ مذاکرات بند گلی کی طرف جارہے ہیں ان حالات میں اپوزیشن اور حکومتی نمائندگان دونوں کی ذمہ داری ہے کہ اس بات چیت کو ہر قیمت پر کامیاب بنائیں ورنہ ان کی ناکامی کے نتائج ملک و قوم کے لئے کسی طرح سود مند نہ ہوں گے۔یہ بات مدنظر رکھی جائے کہ اگر ان کے اس رویہ سے کسی غیر جمہوری اور غیرآئینی صورتحال ابھری تو اس کی تمام تر ذمہ داری حکومت پر عائد ہوگی۔