پاکستان شوبز انڈسٹری تنازعات میں گِھرے ہوئے اداکار فیروز خان کے وکیل فائق علی جاگیرانی نے اداکار منیب بٹ سے معافی کا مطالبہ کرتے ہوئے کہا ہے کہ ان کے خلاف مقدمہ درج کرنے کے لئے ایف آئی اے میں درخواست دائر کردی۔
وکیل فائق علی جاگیرانی کا کہنا ہے کہ اداکار فیروز خان نے جن ساتھی فنکاروں کو جھوٹے الزامات کی بنیاد پر قانونی نوٹس جاری کیا تھا ان میں منیب بٹ کا نام شامل نہیں تھا، اس کے باوجود انہوں نے سوشل میڈیا پر آکر مجھے بدنام کیا۔
ان کا مزید کہنا ہے کہ ہم جانتے ہیں کوئی بھی اپنے مخالفین کی بات سننے کو تیار نہیں ہوتا، لیکن اس کا مطلب یہ نہیں کہ آپ کسی کو بدنام کریں۔
وکیل فائق علی جاگیرانی نے اداکار سے معافی کا مطالبہ کرتے ہوئے کہا ہے کہ اگر اداکار معافی نہیں مانگتے ہیں تو ہم منیب بٹ کے خلاف قانونی کارروائی کا آغاز کرنے کا حق رکھتے ہیں۔
ان کا کہنا ہے کہ ایف آئی اے کی کارروائی کا آغاز ہو گیا ہے، ایف آئی آر درج کروارہے ہیں اور قانون کے مطابق ہرجانہ بھی دائر کیا جائے گا۔
یاد رہے کہ چند دن قبل اداکار فیروز خان نے سابقہ اہلیہ سمیت ساتھی فنکاروں کو ان پر جھوٹا الزامات عائد کرنے کی بنیاد پر ہتک عزت کا نوٹس بھیجاتھا جس کی تصاویر سوشل میڈیا پر وائرل ہوگئیں تھی۔
ان تصاویر میں اداکارہ ایمن خان اور منال خان کا نام اور ذاتی معلومات بھی تھیں جو لیک ہوگئیں جس کے باعث اداکار منیب بٹ نے فیروز خان کے وکیل کو آڑے ہاتھوں لیتے ہوئے اسے پبلیسٹی اسٹنٹ قرار دیا اور کہا کہ قائق علی اپنے یوٹیوب چینل کے ویوز بڑھانے کے لئے اداکار کے ذریعے ایسے اقدامات کرواتے ہیں۔