ایران کے پہلے مقامی ساختہ ہائپرسونک بیلسٹک میزائل ’فتّاح‘ کی رونمائی کردی گئی۔
ایرانی میڈیا کے مطابق، ایرانی صدر ابراہیم رئیسی اورایران کے ایلیٹ ریوولوشنری گارڈز کور کے کمانڈروں نے بھی ہائپرسونک بیلسٹک میزائل کی تقریب رونمائی میں شرکت کی۔
رپورٹ میں بتایا گیا ہے کہ ’فتّاح‘ نامی میزائل کی تصویریں بھی تقریب میں شائع کی گئیں۔
ایران کے سرکاری میڈیا نے گارڈز کی ایرو اسپیس فورس کے سربراہ امیر علی حاجی زادہ کا حوالہ دیتے ہوئے بتایا کہ ’فتّاح ہائپرسونک میزائل‘ کی رینج 1,400 کلومیٹر ہے اور یہ تمام قسم کی دفاعی شیلڈز میں گھسنے کی صلاحیت رکھتا ہے۔
ایران کا دعویٰ ہے کہ ہائپرسونک میزائل آواز کی رفتار سے کم از کم 5 گنا تیز اور پیچیدہ رفتار سے پرواز کر سکتے ہیں جس کی وجہ سے انہیں روکنا مشکل ہے۔
ایرانی میڈیا کا یہ بھی کہنا ہے کہ ایران کا ’فتّاح میزائل‘امریکا اور اسرائیل کے جدید میزائل شکن نظام کو بھی نشانہ بنا سکتا ہے۔
ایران کا امریکی اور یورپی مخالفت کے باوجود بھی کہنا ہے کہ وہ اپنے دفاعی میزائل پروگرام کو مزید ترقی دے گا۔
دوسری جانب مغربی عسکری تجزیہ کاروں کا کہنا ہے کہ ایران بعض اوقات اپنے میزائل کی صلاحیتوں کو بڑھا چڑھا کر پیش کرتا ہے۔
واضح رہے کہ گزشتہ سال ایران نے کہا تھا کہ اس نے ایک ہائپر سونک بیلسٹک میزائل بنایا ہے جو فضا کے اندر اور باہر جا سکتا ہے۔