سابق وزیراعظم شہباز شریف نے نیوزی لینڈ کے خلاف ٹی ٹوئنٹی سیریز میں پاکستان ویمن کرکٹ ٹیم کی تاریخ ساز فتح پر ٹیم کو مبارک باد دی ہے۔
سماجی رابطے کی ویب سائٹ ایکس پر جاری کردہ بیان میں سابق وزیراعظم شہباز شریف نے ویمن کرکٹ ٹیم کے لیے نیک خواہشات کا اظہار کیا۔
ان کا کہنا ہے کہ پاکستان کی ویمن کرکٹ ٹیم نے نیوزی لینڈ میں شاندار کارکردگی دکھائی اور ٹی ٹوئنٹی سیریز جیت کر تاریخ رقم کر دی ہے۔
انہوں نے بہترین کارکردگی پر قومی ٹیم کو مبارک باد دیتے ہوئے کپتان ندا ڈار، بولر فاطمہ ثناء اور بیٹر عالیہ ریاض کو خوب سراہا اور امید ظاہر کی کہ پاکستانی ویمن کرکٹ ٹیم اسی طرح شاندار کامیابی کا سلسلہ ایک روزہ انٹرنیشنل میچ میں بھی جاری رکھے گی۔
خیال رہے کہ پاکستان ویمن کرکٹ ٹیم نے نیوزی لینڈ میں تاریخی فتح حاصل کرتے ہوئے کیویز کے خلاف پہلی مرتبہ ٹی ٹوئنٹی سیریز جیت لی ہے۔
دوسرے ویمن ٹی ٹوئنٹی میچ میں پاکستان نے نیوزی لینڈ کو 10 رنز سے شکست دی اور 3 میچز کی سیریز میں دو۔صفر کی فیصلہ کن برتری حاصل کر لی ہے۔