اسلام کوٹ(رپورٹ عبدالغنی بجیر)تھرکول یوسی جی پراجیکٹ بندش کے بعد غیر محفوظ،مبینہ انتظامی ملی بھگت سے اربوں روپے کی قیمتی مشینری چوری ہونے لگی۔مشینری چوری کے الزام میں تین ملزمان کے خلاف مقدمہ درج کرلیا گیا۔دوگرفتار، تفصیلات کے مطابق تھرکول انڈر گسیفکیشن(یوسی جی)منصوبہ مختلف تکنیکی وجوہات کے باعث سال 2018میں بند کردیا اور ہیوی مشینری جس میں بجلی گھر،لگثری گاڑیاں،پر آسائش رہائش گاہیں لوہی و جستی آلات جن کی مالیت اربوں روپے کی بتائی جا رہی ہے جو کہ سائٹ پر لاوارث پڑے ہوئے ہیں۔منصوبہ کو سپریم کورٹ کے احکامات کے بعد سندھ حکومت کے ادارہ سندھ کول اتھارٹی کے سپرد کیا گیا جس کے بعد سیکورٹی تو تعینات کی گئی مگر ذرائع کے مطابق سیکورٹی کی موجودگی میں پروجیکٹ سے قیمتی مشینری توڑ پھوڑ کر فروخت کی جا رہی ہے۔اس ضمن میں جنگ کی جانب سے رابطہ کرنے پر سندھ کول اتھارٹی کے ڈپٹی ڈائریکٹر محمدطارق کلو نے بتایا کہ پروجیکٹ کی دو سائیڈ سے دیوار نہ ہونے کی وجہ سے چوری کی وارداتیں ہونے لگی ہیں اور اب تک تیس کے قریب ملزمان کے خلاف مقدمات درج کروائے گئے ہیں۔دوسری جانب پروجیکٹ سے ملحقہ دیہات کے مکینوں نے الزام عائد کیا ہے کہ پروجیکٹ پر تعینات سیکورٹی انتظامیہ اور مقامی پولیس کی ملی بھگت سے چوری کی ورادتیں ہو رہی ہیں اور اب تک کئی ٹرکس نکالے جا چکے ہیں۔