اسلام آباد (خبر نگار) اسلام آباد ہائیکورٹ نے ڈپٹی کمشنر اسلام آباد کو پی ٹی آئی کو اسلام آباد میں جلسہ کی اجازت کا معاملہ حل کرنے کی ہدایت کی ہے۔ دوران سماعت جسٹس بابر ستار نے ریمارکس دیئے کہ یہ بھی بتائیں آپ کی تعیناتی سے پہلے اور اس کے بعد جلسوں کی کہاں کہاں اجازت دی جاتی رہی ہے؟ شہریوں کو آئین میں دئیے گئے حقوق کو مدنظر رکھنا ہے۔ پی ٹی آئی کو جلسہ کی اجازت نہ دینے کیخلاف کیس کی سماعت کے دوران عدالت نے درخواست گزار کے وکیل شعیب شاہین ایڈووکیٹ کو مخاطب کر کے کہا کہ آپ بھی تو مانتے نہیں ہیں، ایک جگہ اجازت ملتی ہے تو شرائط کو پورا نہیں کرتے۔ شعیب شاہین ایڈووکیٹ نے یقین دہانی کرائی کہ وہ جلسے کی اجازت کیلئے ضلعی انتظامیہ کی جانب سے عائد کردہ شرائط پر عمل کیلئے تیار ہیں۔ اس پر فاضل جسٹس نے ڈی سی اسلام آباد کو مخاطب کر کے کہا کہ آپ کا اس سے پہلے کا آرڈر بیلنس نہیں تھا، بہتر ہے آپ اس معاملے کو حل کریں، اگر آئندہ آپ آئیں تو مناسب وجوہات بتائیں۔ عدالت نے درخواست گزار کے وکیل سے پوچھا کیا سپریم کورٹ میں توہین عدالت کیس زیر التوا تو نہیں ہے جس پر وکیل نے کہا وہ الگ کیس ہے۔ اس پر فاضل عدالت نے مذکورہ احکامات جاری کرتے ہوئے سماعت ملتوی کر دی۔