اسلام آباد ہائی کورٹ نے اسپاٹ فکسنگ کیس میں کرکٹر شرجیل خان کی جانب سے پی سی بی کے اینٹی کرپشن ٹریبونل کی جانب سے سنائی گئی سزا کے خلاف اپیل ناقابل سماعت قرار دے کر خارج کر دی ہے۔
ذرائع کے مطابق اسلام آباد ہائی کورٹ کے جسٹس عامر فاروق نے کرکٹر شرجیل خان کی اپیل پر سماعت کی۔
پی ایس ایل میں گزشتہ برس اسپاٹ فکسنگ کا معاملہ سامنے آنے پر پی سی بی کے اینٹی کرپشن ٹریبونل نے اسلام آباد یونائیٹڈ کی نمائندگی کرنے والے شرجیل خان کے کرکٹ کھیلنے پر پابندی عائد کر دی تھی۔
پی سی بی کی طرف سے تفضل رضوی جبکہ وفاق کی طرف سے ڈپٹی اٹارنی جنرل راجہ خالد محمود نے دلائل دیے اور موقف اختیار کیا کہ شرجیل خان کو لاہور میں ٹربیونل نے سزا سنائی، اسلام آباد ہائی کورٹ کو اپیل پر سماعت کا اختیار نہیں۔
ادھر جسٹس عامر فاروق نے دلائل سے اتفاق کرتے ہوئے دائرہ اختیار کی بنیاد پر اپیل کو ناقابل سماعت قرار دے کر خارج کر دیا۔