وفاقی وزیر اطلاعات فواد چوہدری نے بھارتی وزیراعظم نریندر مودی کو مشورہ دیا ہے کہ وہ پاکستان مخالفت میں نہیں بلکہ اپنی کارکردگی پر انتخاب لڑیں۔
اسلام آباد میں میڈیا سے گفتگو میں فواد چوہدری نے کہا کہ پاکستان کشیدگی میں اضافہ نہیں چاہتا، اگر بھارت مذاکرات کی میز پر آنا چاہتا ہے تو ہم تیار ہیں۔
انہوں نے کہا کہ دفتر خارجہ نے شاندار کارکردگی دکھائی ہے،آج بھارت عالمی دنیا میں تنہا رہ گیا ہے،دنیا نئی دہلی کے موقف کو تسلیم نہیں کر رہی۔
وزیر اطلاعات نے مزید کہا کہ بھارتی وزیراعظم نریندر مودی کو اپنی کارکردگی پر عام انتخابات میں جانا چاہیے پاکستان مخالفت میں نہیں۔
ان کا کہنا تھا کہ اگر بھارت جارحیت دکھاتا ہے تو ہم نے بھی چوڑیاں نہیں پہنی ہوئیں،پاکستان کے عوام ملک، حکومت اور فوج کے ساتھ کھڑے ہیں۔
فواد چوہدری نے یہ بھی کہا کہ بھارت بھر میں کشمیریوں کو جس طرح نشانہ بنایاجارہا ہے اس پر پاکستان کو تشویش ہے۔
انہوں نے کہا کہ وزیراعظم عمران خان نے وزارت انسانی حقوق کو فعال کردار ادا کرنے کی ہدایت کی ہے۔
اسپیکر سندھ اسمبلی کی گرفتاری پر وزیر اطلاعات نے کہا کہ آج نیب نے آغا سراج درانی کو گرفتار کیا ہے، اس سے حکومت کا کوئی لینا دینا نہیں ہے احتساب کا عمل آزادانہ جاری رہنا چاہیے۔