احتساب عدالت اسلام آباد نے جعلی بینک اکاؤنٹس کیس میں گرفتاری کے بعد جیل میں قید ایک ملزم عبدالغنی مجید کو سولر پینل کے غیر قانونی ٹھیکوں کے کیس میں شاملِ تفتیش کرنے کے لیے دوبارہ گرفتار کر کے جسمانی ریمانڈ حاصل کرنے کی نیب کی استدعا مسترد کر دی۔
قومی احتساب بیور(نیب) نے جعلی بینک اکاؤنٹس کیس کے ملزم عبدالغنی مجید کو سندھ روشن پروگرام میں گرفتار کر کے جسمانی ریمانڈ حاصل کرنے کی درخواست دی جس پر احتساب عدالت کے جج محمد بشیر نے سماعت کی۔
نیب نے عدالت سے استدعا کی کہ ملزم سے سولر پینل کے غیر قانونی ٹھیکوں میں بھی تفتیش درکار ہے، 14 دن کا جسمانی ریمانڈ منظور کیا جائے۔
ملزم کے وکیل نے اعتراض اٹھایا کہ میرے مؤکل سے نیب اس کیس کے سلسلے میں جیل میں تفتیش کر چکا ہے۔
عدالت نے ریمارکس دئیے کہ ملزم جوڈیشل ریمانڈ پر جیل میں ہے، وہاں جا کر تفتیش کریں، دوبارہ جسمانی ریمانڈ نہیں دیا جا سکتا۔
عدالت نے نیب کی استدعا کی مسترد کرتے ہوئے نیب کے تفتیشی افسر کو جیل میں ہی ملزم سے پوچھ گچھ کرنے کی ہدایت کی ہے۔