کویت سٹی(مانیٹرنگ ڈیسک) کویت کی نامور اداکارہ حیاۃ الفہد نے مطالبہ کیا ہے کہ وہ کورونا وائرس کے پیش نظر غیر ملکیوں کو شہروں سے باہر نکال کر صحرا میں چھوڑا جائے۔ رپورٹ کے مطابق 71 سالہ اداکارہ حیاۃ الفہد نے ایک مقامی ٹی وی چینل کو انٹرویو دیتے ہوئے کہا کہ کورونا وائرس کے باعث پیدا ہونے والی صورتحال کے پیش نظر تارکین وطن کو ملک سے باہر نکال دینا چاہیے۔اُن کا کہنا تھا کہ ’ہم تنگ آگئے اور خوف زدہ ہیں کہ اگر بیمار ہوگئے تو کیا ہوگا کیونکہ آبادی کے لحاظ سے اسپتال کم ہیں، ایمرجنسی کی صورت میں ہر شخص کوئی اسپتال میسر نہیں ہوگا۔حیاۃ الفہد کا کہنا تھا کہ ’جب غیر ملکی تارکین کو اُن کا اپنا ملک نہیں رکھنا چاہتا تو ہم نے انہیں کیوں اپنے شہروں میں رکھا ہوا ہے، کورونا کی مصیبت کے دوران تو ایسے تمام لوگوں کو اپنے ملک چلے جانا چاہیے‘۔اُن کا کہنا تھا کہ ’اگر غیرملکی تارکین کویت چھوڑنے پر راضی نہیں تو حکومت انہیں کویت سے باہر نکال کر صحرا میں رکھ دے اور جب حالات معمول کے مطابق ہوجائیں تو واپس لے آئے‘۔حیاۃ الفہد نے وضاحت کی کہ ’میں انسانیت کے خلاف نہیں مگر اس وقت ہم جس مرحلے سے گزر رہے ہیں وہ بہت سنگین ہے، ایسی صورت میں ہمیں سب سے زیادہ غیرملکیوں سے خطرہ ہے‘۔ اداکارہ کو ٹی وی انٹرویو کے بعد شدید تنقید کا نشانہ بنایا گیا۔