کراچی کے علاقے ناظم آباد میں 50 سالہ شخص کو اس کی جواں سال دوسری بیوی کے ساتھ گھر میں تیز دھار آلے کے وار سے قتل کر دیا گیا۔ دونوں افراد کی لاشوں کو اسپتال منتقل کردیا گیا ہے۔
ایس ایس پی ڈسٹرکٹ سینٹرل عارف اسلم راؤ کے مطابق رضویہ سوسائٹی تھانے کی حدود ناظم آباد میں سبحان بیکری کے قریب ایک گھر سے پچاس سالہ سلیم اور اس کی جواں سال اہلیہ کی گلا کٹی لاشیں برآمد ہوئی ہیں۔ قتل کئے گئے شخص سلیم نے مذکورہ خاتون سے چار ماہ پہلے دوسری شادی کی تھی۔
مقتول سلیم اورنگی ٹاؤن میں تعویذ گنڈے کا کام کرتا تھا اور ناظم آباد میں چند ماہ قبل کرایہ کے اس مکان میں منتقل ہوا تھا۔
پولیس کے مطابق جائے وقوعہ سے خون آلود چھرا بھی برآمد ہوا ہے۔ جبکہ عینی شاہدین کے حوالے سے پولیس کا کہنا ہے کہ قتل کی واردات سے کافی دیر قبل اس مکان سے دو سے تین افراد باہر نکلتے دیکھے گئے تھے۔
دونوں افراد کی لاشیں عباسی شہید اسپتال منتقل کردی گئیں جہاں ضابطے کی کارروائی کے بعد پولیس مزید تفتیش کر رہی ہے۔