پاکستان کے معروف صحافی، رپورٹر امین حفیظ کی جانب سے معاون خصوصی فردوس عاشق اعوان سے ’جھپیوں اور پپیوں‘ والے بیان پر وضاحت مانگی گئی ہے جس کی ویڈیو سوشل میڈیا پر خوب وائرل ہو رہی ہے۔
اپنے منفرد طرز رپورٹنگ کے ذریعے صحافت میں ایک علیحدہ پہچان بنانے والے جیو نیوز کے رپورٹر امین حفیظ کی جانب سے پی ٹی آئی کی رہنما فردوس عاشق اعوان سے اُن کے عید پر کورونا ایس او پیز پر عمل در آمد سے متعلق دیئے گئے دلچسپ بیان پر وضاحت مانگی گئی ہے۔
انٹرنیٹ پر وائرل ہوتی ایک ویڈیو میں دیکھا جا سکتا ہے کہ امین حفیظ سیلفی ویڈیو بناتے ہوئے فردوس عاشق اعوان سے سوال پوچھ رہے ہیں کہ اُن کے عید پر جھپیوں اور پپیوں سے گریز والے بیان سے کیا مراد ہے ؟
جس پر فردوس عاشق اعوان نے تفصیلی جواب دیتے ہوئے کہا ہے کہ ’انہوں نے کورونا وائرس کے پھیلاؤ سے بچاؤ کے لیے یہ بیان دیا تھا۔‘
فردوس عاشق اعوان کا ویڈیو میں کہنا تھا کہ’عید پر گلے ملنا ایک لازم اور ملزوم عمل ہے، عید پر ہر کوئی گلے مِل کر عید کی مبارکباد دیتا ہے، اس بیان سے اُن کی مراد یہ تھی کہ اس عید پر اپنے دوستوں اور بھائیوں کو روایتی انداز میں گلے نہ ملیں، اس سے گریز کریں اور اپنے گھروں میں موجود بچوں کو بوسہ نہ دیں۔‘