طبی ماہرین کی جانب سے قدرتی اجزاء اور غذائیں ہمیشہ ہی سے انسانی جسم اور اس کے نظام کے لیے بہترین قرار دی جاتی ہیں جن کے استعمال سے بیش بہا فوائد حاصل کیے جا سکتے ہیں۔
غذائی ماہرین کی جانب سے صحت سے متعلق پیش آنے والے متعدد مسائل کے حل کے لیے ادرک، لیموں، کھیرے اور پودینے کا استعمال تجویز کیا جاتا ہے اور اگر اِن کا استعمال ایک ساتھ اسموتھی کی شکل میں کر لیا جائے تو سو بیماریوں کی جڑ موٹاپے سے بھی دنوں میں جان چھوٹ جاتی ہے اور انسان خود کو تروتازہ اور ہلکا محسوس کرتا ہے۔
ادرک کو اینٹی آکسیڈنٹ کی بھر پور مقدار رکھنے کے سبب سپر فوڈ کا درجہ بھی حاصل ہے، غذائی ماہرین کے مطابق اگر ادرک کھیرے، پودینے کے پتوں اور لیموں کی اسموتھی بنا کر لگاتار ایک مہینہ استعمال کر لی جائے تو جسم میں موجود اضافی چربی خصوصاً پیٹ کی چربی گھُل جاتی ہے اور توند میں واضح کمی آتی ہے، جیب پر ہلکی اور نتائج پر بھاری یہ اسموتھی صحت بہتر بنانے اور جسم سے مضر صحت مادوں کے صفائے کے لیے بھی نہایت موزوں ہے۔
غذائی ماہرین کے مطابق اگر ورزش کیے بغیر وزن میں کمی اور پیٹ اندر کرنا چاہتے ہیں تو سب سے پہلے مرغن اور پروسیسڈ غذاؤں سے اجتناب کریں، گھر کے کھانے کا استعمال اور زیادہ سے زیادہ پانی اگر روٹین میں شامل کر لیا جائے تو با آسانی موٹاپے سے نجات حاصل کی جا سکتی ہے جبکہ مندرجہ ذیل بتائی گئی اسموتھی وزن میں کمی کے سفر میں سونے پر سہاگہ ثابت ہوتی ہے۔
کھیرے، ادرک ، لیموں اور پودینے سے اسموتھی بنانے کا طریقہ :
ایک عدد کھیرا کٹا ہوا، ایک عدد لیموں کا رس، ایک انچ کا ٹکڑا ادرک اور 8 سے 10 پودینے کی صاف دھلی ہوئی پتیاں لے لیں( پودینے کی ٹہنیاں استعمال کرنے سے گریز کریں)۔
اب ان سب اجزاء کو ایک گلاس پانی کے ساتھ خوب اچھی طرح پیس لیں اور رات سونے سے قبل اسے پی لیں۔
ماہرین کے مطابق یہ اسموتھی مہینے کے اندر اندر حیرت انگیز نتائج فراہم کرتی ہے اور توند میں واضح کمی کا سبب بنتی ہے ۔