جمال احمد جمال
دل غرق مئے عشقِ نبیؐ شام وسحر ہے
حُسنِ طلبِ دید تہہِ دیدۂ تر ہے
دشواریٔ احوال دل و جاں ہے فراواں
منزل، سفرِ عشق کی، سرکارؐ کا دَر ہے
وہ شہرِ نبیؐ، تابشِ آئینۂ قدرت
اُس شہر کو جانے کا بہم، عزمِ سفر ہے
رستے میں نہیں، دشمنِ ایماں کا کوئی خوف
معلوم ہر اِک پیچ و خمِ راہ گزر ہے
آنکھوں کو نہیں، حُسنِ جبیں دیکھنا آساں
دل میں طلب تابِ نگہ پیشِ نظر ہے
اعجازِ کرم سب کی نگاہوں میں ہے اُنؐ کا
اِک قطرہ جو لرزاں سرِ مژگاں ہے، گُہر ہے
حیرت میں ہے یہ دیکھ کے حُسنِ رُخِ یوسفؑ
نازاں پسِ تخلیق نبیؐ دستِ ہنر ہے
بے چین طبیعت ہے، جمالؔ عشق میں اُن کے
اُس شہرِ تصوّر کا سفر شام و سحر ہے