سیرئین آبزرویٹری کے مطابق شامی فورسز نے کامیاب پیش قدمی کرتے ہوئے مشرقی حلب کے شمالی محاذوں پر باغیوں کو مکمل طور پر پسپا کر دیا ہے۔
حلب کے اہم اضلاع الصاخور، شیخ خضر اور حیدریہ میں باغیوں کی پسپائی کی وجہ سے مشرقی حلب پر قابض باغی اب دو علاقوں میں تقسیم ہو کر رہ گئے ہیں۔ دوسری طرف کرد جنگجوؤں نے بھی پیش قدمی کی ہے اور شیخ فارس کے علاقے میں ان باغیوں کو مزید پیچھے دھکیل دیا ہے۔
کرد اگرچہ حکومت کے اتحادی نہیں ہیں لیکن باغیوں کا کہنا ہے کہ وہ شامی دستوں کے ساتھ تعاون کرتے ہیں۔ شامی میڈیا اور آبزرویٹری دونوں نے ہی کہا ہے کہ شامی فورسز نے حلب کا ایک تہائی علاقہ بازیاب کرا لیا ہے۔
شامی حکومت کے حامی ایک اخبار ’الوطن‘ نے دعویٰ کیا ہے کہ مشرقی حلب کی بازیابی کے آپریشن میں ملکی افواج بہت تیزی سے کامیابیاں سمیٹ رہی ہیں۔