بھارتی انتہا پسند مرغی کے گوشت کے پیچھے پڑ گئے

23 ستمبر ، 2017

Indian Extremists Are After Chicken Meat

بھارتی شہر گڑگاؤں میں انتہا پسند ہندوؤں نے چکن سمیت گوشت کی سیکڑوں دکانیں بند کرادیں۔

بھارتی میڈیا کے مطابق ریاست ہریانہ کے شہر گڑگاؤں میں انتہا پسند ہندو تنظیم شیوسینا نے اپنے مذہبی تہوار کے موقع پر دھمکیاں دے کر شہر بھر کی گوشت کی 500 سے زائد دکانیں بند کرادیں یہاں تک کہ مرغی بیچنے والوں کو بھی نہیں بخشا۔

شیوسینا گڑگاؤں کے جنرل سیکرٹری ریتو راج نے میڈیا سے گفتگو کرتے ہوئے کہا کہ ہم نے نوراتری تہوار کے موقع تمام چکن اور گوشت کی دکانوں کو 9 روز کے لیے بند کرنے کا نوٹس دے دیا ہے جس کے نتیجے میں انہوں نے خود ہی دکانیں بند کردی ہیں اور جو دکان بند نہیں کرے گا اسے سنگین نتائج کا سامنا کرنا ہوگا۔

ہندو انتہا پسندوں نے گوشت سے بنے کھانے فروخت کرنے والے ریسٹورینٹس اور ہوٹلز بھی بند کرادیے ہیں۔ گڑگاؤں میں زعفرانی رنگ کے لباس میں ملبوس ہندوؤں کے مسلح جتھے گشت کررہے ہیں جن کی وجہ سے مسلمانوں کو اپنی جان کا خطرہ بھی لاحق ہوگیا اور انہوں نے تہوار کے دوران اپنی نقل و حرکت کو محدود کردیا ہے۔

چکن بریانی فروخت کرنے والے تاسیم نے کہا کہ ہمیں اپنی2 دکانیں بند کرنی پڑیں کیونکہ ہمیں توڑپھوڑ اور مارپیٹ کا خطرہ ہے۔ ایک اور دکاندار نے کہا کہ مذہبی جذبات کا احترام اپنی جگہ لیکن یہ ہمارا ذریعہ معاش ہے، انہوں نے 10 روز کے لیے ہمیں کاروبار بند کرنے کا حکم دے دیا ہے۔

تازہ ترین