• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

چٹاگانگ ٹیسٹ: پاکستان کی پوزیشن مضبوط،جیت کیلئے مزید 93 رنز درکار

چٹا گانگ میں کھیلے جارہے پہلے ٹیسٹ میچ میں پاکستان کی پوزیشن مضبوط ہوگئی ہے، پاکستان نے چوتھے روز کے کھیل کے اختتام پر بغیر کوئی کھلاڑی آؤٹ کے 109 رنز بنالیے ہیں۔

بنگلادیش کی جانب سے دیئے گئے ہدف کے تعاقب میں پاکستانی اوپنرز کے درمیان 100 رنز کی شراکت داری قائم ہوگئی اور دونوں نے نصف سنچری مکمل کرلی ہے۔

پاکستان کو جیت کے لیے مزید 93 رنز درکار ہیں جبکہ 10 وکٹیں باقی ہیں۔

عابد علی نے 92 گیندوں پر 6 چوکوں کی مدد سے نصف سنچری بنائی۔ یہ ان کے کیریئر کی تیسری نصف سنچری ہے۔

عبدﷲ شفیق نے بھی نصف سنچری مکمل کرلی ہے، انہوں نے 88 گیندوں پر نصف سنچری بنائی جس میں 6 چوکے اور ایک چھکا شامل ہے۔

دوسری اننگز

خیال رہے کہ دوسری اننگز میں بنگلادیش کی پوری ٹیم 157 پر آؤٹ ہوگئی اور یوں پاکستان کو جیت کے لیے 202 رنز کا ہدف دیا ہے۔

شاہین شاہ آفریدی نے ٹیسٹ کی دوسری اننگ میں 5 وکٹیں حاصل کیں، جبکہ پہلی اننگ میں حسن علی نے بھی 5 شکار کیے تھے۔

تیسرے دن جب بنگلادیش نے اپنی دوسری اننگز کا آغاز کیا تو ٹیم ابتداء میں مشکلات کا شکار ہوئی، میزبان ٹیم کو دوسری اننگز میں بیٹنگ شروع کرنے سے قبل ہی 44 رنز کی برتری حاصل ہوئی تاہم اس کے اوپنرز ٹیم کو ایک بار پھر اچھا آغاز نہ فراہم کر سکے۔

میزبان ٹیم کو دوسری اننگز میں اپنی پہلی اور دوسری وکٹ کا نقصان 14 کے اسکور پر ہوا جب شادمان اسلام 1 اور نجم الحسن شانتو بغیر کوئی رن بنائے پویلین لوٹ گئے۔

ٹیم کا اسکور 15 پر پہنچا تو مومن الحق بھی صفر پر پویلین چلتے بنے، 18 رنز بنانے والے سیف حسن 25 کے مجموعی اسکور پر آؤٹ ہوئے۔ 

بنگلادیش کی پانچویں وکٹ 43 رنز پر گری، آؤٹ ہونے والے کھلاڑی مشفیق الرحیم تھے جنہوں نے 16 رنز بنائے جبکہ میزبان ٹیم کی چھٹی وکٹ مہدی حسن کی شکل میں 115رنز پر گری، وہ 11 رنز بناسکے۔

میزبان ٹیم کی ساتویں وکٹ یاسر علی کی جگہ کنکشن قانون کے تحت آنے والے کھلاڑی نورالحسن کی گری، جنہوں نے 15 رنز بنائے جبکہ نصف سنچری بنانے والے لٹن داس شاہین شاہ آفریدی کا شکار ہوئے۔

اس کے بعد آنے والے کھلاڑی ابو جاوید بھی کوئی رن بنائے بغیر پویلین لوٹ گئے جبکہ بنگلادیش کے آخری کھلاڑی عبادت حسین بھی کوئی رن بنائے آؤٹ ہوئے۔

پاکستان کی جانب سے شاہین شاہ آفریدی نے 5 شکار کیے جبکہ ساجد خان نے 3 وکٹ حاصل کیں اور حسن علی کے حصے میں 2 وکٹیں آئی۔

شاہین شاہ کا باؤنسر

شاہین شاہ آفریدی کے تیز باؤنسر کی وجہ سے بنگلا دیش کے بیٹسمین یاسر علی ریٹائرڈ ہرٹ ہوگئے۔

شاہین آفریدی کا تیز باؤنسر یاسر علی کے ہیلمٹ پر لگا، انہوں نے 36 رنز بنائے تھے۔ ان کی اننگز میں 6 چوکے شامل تھے۔

یاسر علی کی جگہ نورالحسن کو کنکشن قانون کے تحت بنگلا دیشی ٹیم میں شامل کیا گیا، نورالحسن بنگلادیش کی جانب سے صرف بیٹنگ کریں گے۔

پہلی اننگز

پہلی اننگز میں پاکستان کے صرف اوپنرز ہی چل سکے، 146 رنز کوئی آؤٹ نہیں سے صورتحال نے ایسا پلٹا کھایا کہ 286 رنز پر پوری ٹیم ڈھیر ہوگئی۔پاکستان کی جانب سے عابد علی نے سنچری اسکور کی۔

بنگلادیش کی طرف سے تیج الاسلام نے شاندار بولنگ کا مظاہرہ کرتے ہوئے 7 کھلاڑیوں کو آؤٹ کیا جبکہ عبادت حسین نے 2 وکٹیں حاصل کیں، ایک وکٹ مہدی حسن کے حصے میں آئی۔

بنگلادیش پہلی اننگز میں 330 رنز بناکر آؤٹ ہوئی تھی، بنگلا دیش نے میچ میں پہلے دن کے کھیل کے اختتام پر 4 وکٹ کے نقصان پر 253 رنز بنائے تھے جبکہ دوسرے روز کے کھیل میں میزبان ٹیم مزید 77 رنز بناسکی۔

پاکستان کی طرف سے حسن علی نے شاندار بالنگ کا مظاہرہ کرتے ہوئے بنگلا دیش کے 5 شکار کیے جبکہ شاہین شاہ آفریدی اور فہیم اشرف نے 2،2 وکٹیں حاصل کیں۔ ساجد خان کے حصے میں ایک وکٹ آئی۔

کھیلوں کی خبریں سے مزید