فرمان الہی
نماز کے اوقات
چین میں کورونا وائرس کے کیسز میں تیزی کا رجحان ہے جس کے بعد چینی شہر ژیان میں سفری پابندیوں میں سختی کردی گئی ہے۔
ژیان میں آج سے غیرضروری گاڑیوں کے سڑکوں پر آنے پر پابندی لگادی گئی ہے اور خلاف ورزی کرنے والے افراد کو 10 دن پولیس کی حراست اور 500 یوآن جرمانے کا سامنا کرنا ہوگا۔
ژیان میں آج سے کورونا ٹیسٹنگ کا نیا مرحلہ بھی شروع ہوگیا ہے۔ یاد رہے کہ ژیان میں لاک ڈاون کا آج پانچواں روز ہے۔
ادھر نیو یارک سٹی کے اسپتالوں میں اومی کرون سے متاثرہ بچوں کی تعداد میں 4 گنا تک اضا فہ ریکارڈ کیا گیا۔
اسپتال میں داخل ہونے والے بچوں کی نصف تعداد 5 سال سے کم عمر ہے جنھیں ویکسین نہیں لگی جبکہ امریکا میں کورونا ٹیسٹنگ بھی کم ہوگئی ہے۔
برطانیہ سمیت یورپی ملکوں میں بھی اومی کرون کیسز بڑھ گئے ہیں جبکہ فرانس میں کورونا کے حوالے سے آج اہم اجلاس ہو گا۔
سعودی عرب میں 16 سال کی عمر کے نوجوانوں کو بوسٹر ویکسین لگانے کی منظوری دے دی گئی۔
دوسری جانب کرسمس اور ویک اینڈ کی چھٹیوں پر اومی کرون کے سبب دنیا بھر میں 8 ہزار کے لگ بھگ پروازیں منسوخ کرنا پڑ گئیں، اس کے علاوہ ہزاروں پروازیں تاخیر کا شکار ہوئیں جبکہ متعدد ایئرلائنز کے پائلٹس اور دیگر عملہ وائرس کی زد میں آگیا۔
معلوم ہوا ہے کہ آج مزید 800 اور منگل کو 170 پروازیں منسوخ ہونے کا امکان ہے۔
کورونا کیسز کی اطلاع پر امریکا میں 60 سے زائد کروزشپس کی مانیٹرنگ شروع کردی گئی اور کئی بحری جہازوں کو روک لیا گیا ہے۔
