• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کامن ویلتھ گیمز کی کوئنز بیٹن ریلے پاکستان کے سفر پر

فوٹو: فائل
فوٹو: فائل

کامن ویلتھ گیمز کی کوئنز بیٹن ریلے ان دنوں پاکستان کے سفر پر ہے، کراچی میں آج کوئنز بیٹن کو عوامی مراکز پر لے جایا گیا۔

وزیراعلیٰ سندھ مراد علی شاہ کا کہنا ہے کہ کوئنز بیٹن ریلے کا پاکستان آنا خوش آئند ہے۔

یہ پہلا موقع ہے کہ کامن ویلتھ گیمز کی کوئنز بیٹن ریلے کو پاکستان کے سب سے بڑے شہر کراچی لایا گیا۔ 

کراچی کے دورے پر آئی کوئنز بیٹن کو قائدِ اعظم محمد علی جناح کی مادر علمی درس گاہ سندھ مدرستہ الاسلام لایا گیا جہاں سیکڑوں طلبہ و طالبات نے اس کا استقبال کیا۔

سندھ مدرستہ الاسلام کے آڈیٹوریم میں ہونے والی پُروقار تقریب میں برٹش ہائی کمشنر مارٹن ڈاؤسن، پاکستان اولمپک ایسوسی ایشن (پی او اے) کے صدر جنرل عارف حسن، ایتھلیٹس طلحہ طالب، ارشد ندیم، انعام بٹ سمیت کئی کھلاڑی بھی موجود تھے، طلبہ نے کوئنز بیٹن کے ساتھ تصاویر اور سیلفیاں بنائیں۔

کامن ویلتھ گیمز کی کوئنز بیٹن ریلے مزار قائد پہنچی، جہاں بیٹن وزیراعلیٰ سندھ مراد علی شاہ کو دی گئی، تقریب میں برٹش ہائی کمشنر مارٹن ڈاؤسن سمیت اولمپئنز، ایتھلیٹس کی بڑی تعداد شریک ہوئی۔ 

کوئنز بیٹن نے 269 دنوں میں 90 ہزار میل کا فاصلہ طے کرتے ہوئے دولت مشترکہ کے 72 ممالک کا دورہ کر رہی ہے۔

بیٹن نے اپنے سفر کا آغاز 7 اکتوبر کو بکنگھم پیلس سے کیا اور پاکستان 23واں ملک ہے جہاں وہ اپنا سفر مکمل کر رہی ہے۔

کامن ویلتھ گیمز آئندہ سال جولائی میں انگلینڈ میں ہوں گے، پاکستان کی درجن سے زائد کھیلوں میں شرکت کی توقع ہے۔

کھیلوں کی خبریں سے مزید